➖➖ माझी लेक खूप गोड ➖➖
माझी लेक खूप गोड । जशी पेरूची ती फोड
सुखी संसाराला जोड । जन्म तिचा भाग्याचा !! १ !!
होता एक महिन्याची । घाई झाली बारश्याची
असे लाडकी साऱ्यांची । नाव ठेवा आनंदी !! २ !!
दुडूदुडू धाव घेता । हाक आई बाबा देता
तिला फिरावया नेता । होतो हर्ष अमाप !! ३ !!
घ्यावे शिक्षण अमाप । घडो हातूनी प्रताप
खंदा आहे तिचा बाप । स्वप्न पूर्ण कराया !! ४ !!
मोठी होई जशी जशी । सुवर्ण बावन्नकशी
तीच रवी तीच शशी । गर्व मजला तिचा !! ५ !!
हात होतील पिवळे । थाटामाटात सोहळे
कसा देऊ बळेबळे । सांगा निरोप तिला !! ६ !!
होवो संसार सुखाचा । पडो विसर दुःखाचा
क्लेश नकोच फुकाचा । कधी जीवनी तिच्या !! ७ !!
🍃🍃 सागरराजे निंबाळकर 🍃🍃
No comments:
Post a Comment
आपल्या अभिप्रायाबद्दल मनःपूर्वक आभार !