वृत्त :- सुकेशी
लगावली :- लगागागा लगागा (पुनरावृत्ती)
यती :- सातव्या अक्षरावर
----------- नव्याने सावरावे -----------
(वृत्तबद्ध गीत)
मनाला माझिया मी, कितीदा आवरावे
जरासा तोल जाता, नव्याने सावरावे !! धृ !!
कुणाला दोष द्यावा, कुणाचा रोष घ्यावा
असो कोणी कसेही, हरेका हात द्यावा
मनाजोगे जरीही, कधी झालेच नाही
सुखाने योजलेले, मिळाले रोज काही
करावे कर्म मोठे, नि साधे वावरावे !! १ !!
मलाही रोज येते, निनावी पत्र आता
पुन्हा मी आठवांच्या, जुन्या गावात जाता
फुलावे की झुरावे, मना तू सांग थोडे
कळेना सोडवावे, कसे हे द्वाड कोडे
मनाच्या काळजीने, कधी ना बावरावे !! २ !!
तसेही पुण्य माझे, कधी कामी न आले
जरासे पाप होता, किती आरोप झाले
सुखाचा एक धागा, सुईने जोडताना
प्रपंचाचे किनारे, नदीला ओढताना
क्षणांच्या पालवीने, वयाला नावरावे !! ३ !!
🤗 सागरराजे निंबाळकर
