----- लाखात एक माझी गोड परी -----
दिसते लाखात एक, माझी गोड परी
गातो कवने मी जिची, अशी छंदाक्षरी !! धृ !!
नाव लाडक्या परीचे, ठेवले प्रचिती
लक्ष्मी सोन पावलांची, भाग्योदय किती
बोबड्या ह्या बोलातून, शब्द आई बाबा
क्षणार्धात घेतलेला, काळजाचा ताबा
माझ्या आनंदाची तीच, खरी मानकरी !! १ !!
सांग कधी बांधायचा, पत्त्यांचा बंगला
खेळ लपाछपीचा हा, कितीदा रंगला
घरी येताना आणता, लेमनची गोळी
घट्ट बिलगली मला, राणी साधीभोळी
कधी रागावते कधी, बळेच मस्करी !! २ !!
वेळ देत नाही मज, हीच तिची खंत
ऐक लाडे प्रपंचाला, नाही कधी अंत
देत जाईन यापुढे, वेळ हवा तसा
या धावून पटकन, मांडीवर बसा
रुसवा फुगवा बाळा, सोड आतातरी !! ३ !!
@ सागरराजे निंबाळकर, कल्याण
No comments:
Post a Comment
आपल्या अभिप्रायाबद्दल मनःपूर्वक आभार !