छान आहे

~ छान आहे 

रंगीत पान आहे

आयुष्य छान आहे

झाली विवाहसंस्था

दोलायमान आहे

राणी स्वभाव अपुला

अगदी समान आहे

आटेल पूर्ण गंगा

इतकी तहान आहे

ख्याती बरीच मोठी

मूर्ती लहान आहे

माया अपार करते

आई महान आहे

▪️सागरराजे निंबाळकर, कल्याण

फेरा जन्म मरणाचा

~ फेरा जन्म-मरणाचा

चिंतेपायी जेव्हा जातो

बाप रोज गुत्त्यावर

राख होते काळजाची

आणि मरते नजर

आई उघड्या डोळ्यांनी

सारी दुर्दशा बघते

बळ आणून उसणे

कशीबशी सावरते

बाप बघतो आकाश

एकटक जेव्हा-जेव्हा

मला दिसतो चातक

त्याच्यामध्ये तेव्हा-तेव्हा

त्याच्या मनाजोगं कधी

येत नाही पीकपाणी

ऋतू कोणताही असो

लागू होते आणीबाणी

सावकार दारी येता

त्याला भरते धडकी

कोण जाणे दोर कशी

हाती लागते नेमकी

जातो पिंजरा खोलून

मागे सोडून पिल्लांना

दूर सारावे लागते

मग वह्या, पुस्तकांना

सुरू राहतो असाच

फेरा जन्म-मरणाचा

एकदाही येत नाही

क्षण वाट्याला सुखाचा

@ सागरराजे निंबाळकर, कल्याण

कोण कुणाचा उरला

~ कोण कुणाचा उरला..

नातीगोती नावापुरती

प्यारी केवळ माया

उभा ठाकतो समोर मृत्यू

तेव्हा कळते छाया

श्वास मोजके हाती उरता 

गडबड होते सारी

चक्रामधून नियतीच्या या

नर सुटतो ना नारी

जगून घ्यावे मनासारखे

चिंता हवेत उडवत

भार कशाला प्रौढत्वाचा 

लहान व्हावे नकळत

गाडी-माडी कपडालत्ता

मागे सुटून जाते

मृत्यूसोबत आयुष्याचे

असेच असते नाते 

आत्मासुद्धा अपुला नाही

आहे नश्वर काया

दोन घडीच्या मोहापायी

जीवन जाते वाया

मातीमध्ये प्रत्येकाचा

शेवट आहे ठरला

विसावल्यावर सरणावरती

कोण कुणाचा उरला

🌺 सागरराजे निंबाळकर, कल्याण