अष्टाक्षरी चारोळी - 8
तिच्या मनात होकार
ओठांवर होतं नाही
खेळ सारा नियतीचा
दोष नव्हता तिचाही
▪️सागरराजे निंबाळकर, उल्हासनगर
Wednesday, April 14, 2021
आयुष्याच्या नौकेवर
अष्टाक्षरी चारोळी - 7
आयुष्याच्या नौकेवर
स्वार झाली स्वप्न सारी
त्यांच्या स्वागतासाठी मी
उभा केव्हाचा किनारी
▪️सागरराजे निंबाळकर, उल्हासनगर
होती पक्की व्यवहारी
अष्टाक्षरी चारोळी - 6
नात्यांमध्ये नेहमी जी
होती पक्की व्यवहारी
जाताजाता आठवांची
तिने ठेवली उधारी
▪️सागरराजे निंबाळकर, उल्हासनगर
तुझ्या एका होकाराने
अष्टाक्षरी चारोळी - 5
शक्य होते खूप काही
तुझ्या एका होकाराने
दूर गेलीस निघून
जेव्हा जड पावलाने
▪️सागरराजे निंबाळकर, उल्हासनगर
हवा थोडासा जिव्हाळा
अष्टाक्षरी चारोळी - 4
जास्त काही नको मज
हवा थोडासा जिव्हाळा
तुला निरोप देताना
जर दाटला उमाळा
▪️सागरराजे निंबाळकर, उल्हासनगर
ठेवतो तयारी
अष्टाक्षरी चारोळी - 3
जरी नसली ठाऊक
मज दिशा प्रवासाची
तरी ठेवतो तयारी
निरंतर चालण्याची
▪️सागरराजे निंबाळकर, उल्हासनगर
तुझ्या आठवांचे ढग
अष्टाक्षरी चारोळी - 2
तुझ्या आठवांचे ढग
पुढे जाती हळूहळू
माझे मलाच कळेना
त्यांच्यामागे किती पळू
▪️सागरराजे निंबाळकर, उल्हासनगर
अष्टाक्षरी चारोळी
अष्टाक्षरी चारोळी - 1
कणखर जरी वर
खूप तुटतो आतून
जेव्हा रडणे टाळतो
बाप धाय मोकलून
▪️सागरराजे निंबाळकर, उल्हासनगर
Saturday, April 3, 2021
थोडे ठेवतो अंतर
▪️थोडे ठेवतो अंतर
नका विचारू त्यावेळी
काय वाटते जीवाला
जेव्हा क्षणात निरोप
द्यावा लागतो कुणाला
तसा सोबती कायम
येथ नसतो कुणीही
मनाजोगे वाटताना
होते काहीही, कधीही
कधी सांगावा एखादा
कधी भेट अचानक
काय बोलावे कुणाला
जो-तो मर्जीचा मालक
चालताना नकळत
सुटलाच कधी हात
कैक होतात जखमा
खोलवर काळजात
म्हणूनच आता मीही
थोडे ठेवतो अंतर
होत नाही मग त्रास
हात सुटल्यानंतर
▪️सागरराजे निंबाळकर, उल्हासनगर
Friday, April 2, 2021
मन माझे...
▪️मन माझे...
हळूवार हृदयाची
उघडली मी संदूक
जपलेल्या आठवांनी
केले क्षणात भावूक
कुठे घेऊन जातील
नाही आठवांचा नेम
कधी भंगती अपेक्षा
कधी नकळत प्रेम
सारे ठाऊक असून
मन कुणाचे ऐकते
वेगेवेगे धावताना
एकाजागी विसावते
पाठ टेकली धरेला
केली नभाची चादर
क्षणार्धात मन माझे
पोहोचले चंद्रावर
स्वप्न ठेवता उशाशी
झोप लागली क्षणात
चालू होता उगाचच
किती गोंधळ मनात
▪️सागरराजे निंबाळकर, उल्हासनगर
Subscribe to:
Posts (Atom)