दोष कसा देऊ माझ्या संचिताला (१४ अक्षरी गीत)

---- दोष कसा देऊ माझ्या संचिताला ----

दोष कसा देऊ मीच, माझ्या संचिताला
कसं पाठवू माघारी, माझ्या साजणाला !! धृ !!

भेट होते कधीतरी, मिळतो एकांत
हितगुज चाले मग, किनारी निवांत
आणाभाका शपथा नि, हाती देत हात
हरवून भान सारे, पाहू नयनात

लवते अताशा कुठे, पापणी डोळ्याला !! १ !!

संसाराच्या महालात, झालो राजा राणी
एक मुखाने गायली, आयुष्याची गाणी
जन्म गोजिऱ्या कृष्णाचा, झाला गोकुळात
मावेनाच आज माझा, हर्ष गगनात

पोटा पाण्याने धाडले, दूरच्या देशाला !! २ !!

बाळ बोबड्या बोलाचे, रांगाया लागले
पत्राद्वारे दिले तुम्ही, संस्कार चांगले
तुम्हाविन राया माझी, अंधारी दिवाळी
येत जावा अध्येमध्ये, तुम्ही कधीकाळी

दाबू कुठवर सांगा, मीही हुंदक्याला !! ३ !!

दिसा मागे दिस गेले, निरोप न आला
वेळ साधून काळाने, घातलेला घाला
साहवेना मज आता, कांकणाचा भार
असा कोणता मजला, जडला विकार

फुलांनीच केला वार, माझ्या काळजाला !! ४ !!

🌿🍃 सागरराजे निंबाळकर 🍃🌿

चारोळी

जमतात काही गोष्टी सरावाने
प्रयत्न आपण सोडायचे नाहीत

कठीणच असतं मिळवणं हवं ते
मात्र, रस्ता ज्याचा त्याला माहीत

@ सागरराजे निंबाळकर

संविधान वाचताना (१४ अक्षरी गीत)

-------    संविधान वाचताना    -------
            (१४ अक्षरी गीत)

संविधान वाचताना, फुलते ही छाती
काय जादू होती अशी, बाबांच्या त्या हाती !! धृ !!

होवो सुखी बहुजन, हाच एक ध्यास
बॅरिस्टर होण्या केला, अफाट अभ्यास
दोन वेळच्या खाण्याची, होती जेथे भ्रांत
संविधानामुळे तेथे, सुखावला प्रांत

जादूगार लेखणीने, जोडलेली नाती !! १ !!

साधंसुधं काम नव्हे, होती दिव्यदृष्टी
पंचशील, करुणेची, धम्ममय सृष्टी
हळूवार सांभाळत, साऱ्यांच्या भावना
दिन सोनियाचा केला, साहून यातना

आनंदाने उजळल्या, दिस आणि राती !! २ !!

समता, बंधुता आणि, एकतेचा नारा
देत नाही संविधान, अन्यायाला थारा
लोकराज्याची आमुच्या, आहे न्यारी शान
राष्ट्रास सांधणारी ही, घटना महान

गुण्यागोविंदाने नांदो, विविधांगी जाती !! ३ !!

बंदी उठवून केली, सोय संचाराची
अभिव्यक्ती, मतदान, संधी भाषणाची
अन्न, वस्त्रासवे दिला, हक्क शिक्षणाचा
मनोभावे ठेवू सारे, मान कायद्याचा

सुखावला बळीराजा, सुखावली माती !! ४ !!

@ सागरराजे निंबाळकर, कल्याण
        संपर्क :- ८८७९८९७७९७

चारोळी

कोण लागतो मी तुझा?
हा प्रश्न जेव्हा तू केलास मला

तेव्हाच ओळखलं कौशल्य उसणं
ही तुझी स्वतःची नाहीच कला

🤗 सागरराजे निंबाळकर

चारोळी

सुरुवात तुझ्यापासून अन
शेवटही तुझ्याजवळ माझा

तू राणी ह्या काळजाची
मी तुझ्या आयुष्याचा राजा

🤗 सागरराजे निंबाळकर

चारोळी

मोकळ्या मनाने संसार करूया
नकोच ही वचनाची बाधा

मी कृष्ण मुरारी तुझा अन
सये तू, माझी प्रेमळ राधा

🤗 सागरराजे निंबाळकर

चारोळी

विश्वास ठेव प्रेमावर माझ्या
मी तुझाच आहे माझे राणी

शपथ घेतलीस ना माझ्यासवे
मग का अशी बदलते वाणी

🤗 सागरराजे निंबाळकर

चारोळी

व्याकुळलेल्या मनावर तुझ्या
नको कधीच विरहाचा घाला

तू आल्याची खात्री झाली
जेव्हा पैंजणांचा आवाज आला

🤗 सागरराजे निंबाळकर

चारोळी

एकदा आगमन केलं मैफिलीत
तरी किती ही, वाहवाही झाली

आत्ता कुठे रंगेल खेळ प्रेमाचा
सये तू इतुक्यात कुठे निघाली

🤗 सागरराजे निंबाळकर

चारोळी

बळी पडण्याची भाषा प्रेमात
सये, बिलकुल शोभत नाही

मी घेतला तोच अर्थ ना? की
तुझं दुसरंच आहे, प्रयोजन काही

🥰 सागरराजे निंबाळकर

चारोळी

तू होतीस म्हणून आलो इथवर
तुझ्याशिवाय काहीच शक्य नाही

मी जगतोय छत्रछायेखाली तुझ्या
लाभो उदंड आयुष्य, आई तुलाही

🤗 सागरराजे निंबाळकर

चारोळी

डोकावून पाहता हृदयी तुझ्या
मज दिसला, आसवांचा पूर

काय कारण सांग नेमकं
नको काळजाला माझ्या हुरहूर

🤗 सागरराजे निंबाळकर

निरांजनातील वाती (१४ अक्षरी गीत)

-------   निरांजनातील वाती   -------

निरांजनातील वाती, नित्य जळतात
वेदना तयांच्या सांगा, कुणा कळतात !! धृ !!

जरी दिसत असला, इवलासा धागा
आहे अस्तित्व त्याचेही, द्यावी त्याला जागा
नको तेवढे साहतो, चटके जिव्हारी
तरी लख्ख उजळतो, प्रत्येकाच्या द्वारी

वाटा अंधाऱ्या अताशा, दूर पळतात !! १ !!

जोडी पणती दिव्याची, किती गोड वाटे
सुख फुलासम जरी, तुडविले काटे
साथ तेलाची लाभता, ओल्या होती वाती
वारा बिलगतो जसा, बसता एकांती

फुलवाती मनाजोग्या, छान वळतात !! २ !!

निजतात खुशालीने, मालवून वात
दृश्य पाहून साठते, दुःख काळजात
प्रकाश देऊनी साऱ्या, अंधारच भाळी
येऊ नये कधी अशी, कुणावर पाळी

रात्री जळणे दिवसा, अश्रू ढळतात !! ३ !!

🌿🍃 सागरराजे निंबाळकर

चारोळी

पुन्हा येणं होणार नाही म्हणत
नकळत, दारात पाय अडखळलेला

ओठांवर हसू उसणं आणलेलं मात्र
प्रत्यक्षात चेहरा नको तितका पडलेला

🌹 सागरराजे निंबाळकर

मज कळलेच नाही

-- मज कळलेच नाही --

सुटणार कधी कसे
माझ्या आयुष्याचे कोडे
पुरे पुरे म्हणताना
गेले राहूनिया थोडे

पाप पुण्य तोलताना
हाती न्यायाचा तराजू
साक्षीदार मी माफीचा
कशी मांडू माझी बाजू

आशा आकांक्षांचं ओझं
जड झालंय मलाही
लवलेश हसण्याचा
माझ्या ओठांवर नाही

टाळतात सुखं जेव्हा
होते जखम उरात
डबडबलेले डोळे
तरी मी गातो सुरात

ओठ शिवलेले अन
डोळे घट्ट मिटलेले
व्याज भरत राहिलो
जरी कर्ज फिटलेले

मोजतोय घटका मी
आता शेवटच्या काही
कसे जगावे जीवन
मज कळलेच नाही

@ सागरराजे निंबाळकर

चारोळी

वाटलं लाजल्याने पाहत नसावी
प्रत्यक्षात मात्र, मला टाळत होती

माझं अस्तित्व जास्तीचं आहे सांगून
माझ्या नकळत, मला गाळत होती

🌹 सागरराजे निंबाळकर

चारोळी

प्रयत्न करतो विसरण्याचा मात्र
राहून राहून आठवतो भूतकाळ

वाट पाहण्यात तुझी अताशा
सरतेय माझी सांजसकाळ

🍃 सागरराजे निंबाळकर

चारोळी

जखम होते काळजाला जेव्हा अन
डोळ्यातून आसवांचा, बांध फुटतो

तेव्हाच स्फुरतं वाक्य दर्दी एखादं
माझ्यासारखा लिहिण्याची मजा लुटतो

🍃 सागरराजे निंबाळकर

सागराचा वाटा (षोडशाक्षरी)

---------      सागराचा वाटा      ---------

येता जाता हट्ट तिचा, आणा बाजूबंद राया
क्षण आनंदाचा ऐसा, कसा जाऊ देऊ वाया

नथ नाकात शोभते, पायी चांदीचे जोडवे
नितदिन गातो आता, माझ्या सयेचे गोडवे

कसा वर्णावा कळेना, थाट न्यारा डोरल्याचा
लाजताना होतो भास, नजरेने ओढल्याचा

घेता कुशीत प्रियेला, आड येते एक बट
करंगळी होते सज्ज, उधळाया तिचा कट

गुज साधता डोळ्यांनी, ओठ करती इशारा
मधुचंद्र साधावया, देती चांदण्या पहारा

ओठ ओठात गुंतता, सखी होते लालबुंद
विसरून सारे भान, होतो दोघेही बेधुंद

शंख, शिंपले जन्माया, आहे सागराचा वाटा
कुणा कळते किनारी, कशा आदळती लाटा

🍃🍃 सागरराजे निंबाळकर 🍃🍃

चारोळी

राहतील सीमेत आखलेल्या
बळ इतुकेच, पंखांना द्यावे

सारेच फितूर येथे, राजे
आता नाव कुणाकुणाचे घ्यावे

🍃 सागरराजे निंबाळकर

चारोळी

मुळावर घाव घालून विचारते
वेलींचं आता, काय करायचं?

शांत राहणं पसंत करतो अशावेळी
काही बोलून, वेगळं का ठरायचं

😊 सागरराजे निंबाळकर

चारोळी

कोणाचा आहे सागर नेमका?
आपापसात भांडत राहिल्या लाटा

शंख, शिंपले गिणतीत नव्हतेच
लक्षातही न आला पाण्याचा वाटा

🍃 सागरराजे निंबाळकर

महिलांचे योगदान (१४ अक्षरी गीत)

--------- महिलांचे योगदान ---------

महिलांचे योगदान, समाजाला तारी
तीच चारिधाम तीच, पंढरीची वारी !! धृ !!

जिजाऊने घडविला, स्वराज्याचा छावा
मीरा गाताना वाजतो, गोकुळात पावा
बहिणाई गाते नित्य, जात्यावर गाणी
भल्या भल्यांना पाजते, लक्ष्मीबाई पाणी

कधी साधीभोळी कधी, अष्टभुजा धारी !! १ !!

लतादीदी आहे माझी, सुरिली कोकिळा
नर्मदेच्या आड येता, मेधा घाली खिळा
झाली प्रतिभा संपन्न, राष्ट्रपती येथे
इंदिराही सांगे मग, आम्हीच विजेते

खांद्याला खांदा लावूनी, चालतेय नारी !! २ !!

कल्पना गेली आकाशी, उंच झेप घ्याया
अनाथांची माय सिंधू, काय वर्णू माया
आया, बायांनो, लेकींनो, सावित्रीस स्मरा
रमाईच्या आठवांनी, जोडू दोन्ही करा

झेंडा उंच रोवताना, फुंकली तुतारी !! ३ !!

माधुरीचा अभिनय, लाखाची पर्वणी
सुरेखा पुण्याची जणू, शुक्राची चांदणी
आनंदीच्या पावलांचा, वैद्यकीय ठसा
चालवू असाच पुढे, कर्तृत्वाचा वसा

संस्कृतीचं लेणं शोभे, वस्त्र जरतारी !! ४ !!

@ सागरराजे निंबाळकर, उल्हासनगर

चिंता नकोच गझले (आनंदकंद)

--------- गझलेस माझ्या ---------

गझलेस येथ माझ्या जे जे हवे मिळाले
जेव्हा रसिक स्वराने हे मंत्रमुग्ध झाले

शेरात काफिया अन खासा रदीफ घेता
सजली लगावली ही सौंदर्य छान आले

सांभाळ शब्द कारण देतात घाव न्यारे
असतात जे फुलासम होतात तेच भाले

समजून घेतला मी ज्यांचा सदा इशारा
मत स्पष्ट मांडता मी अनभिज्ञ ते निघाले

चिंता नकोच गझले मिळणार काय ह्याची
सारे तुझेच आहे करतो तुझ्या हवाले

🍃 सागरराजे निंबाळकर

गझले तुझ्या नशेने (आनंदकंद)

--------- गझले तुझ्या नशेने ---------

झाले असेल माझ्या हातून पाप काही
का याचना क्षमेची मंजूर होत नाही

संसार एकट्याने झाला कधी कुणाचा
जर मी असेन राजा राणी म्हणा तिलाही

आयुष्य पास होण्या लाखो दिल्या परीक्षा
नापास होत गेलो वार्षिक कधी तिमाही

सोडून हात माझा गेलीस का अशी तू
केली कधीच नाही पर्वा प्रिये जराही

शेतात थेंब माझ्या येतो कधीतरी, पण
डोळ्यात आसवांचा हा पूर बारमाही

वृत्तात गझल रचण्या दमछाक फार होते
भलतेच कसब लागे वाटे तशी सजाही

गझले तुझ्या नशेने बेधुंद जाहलो मी
पर्वा मला न त्याची बदनाम मी तसाही

🍃 सागरराजे निंबाळकर

चारोळी

वास्तवाचे निखारे हाती घेऊन, जे
काट्याकुट्यातून वाट सर करतात

त्यांनाच सलाम करते दुनिया अन
आदर्श त्यांचे सहज नजरेत भरतात

🍃 सागरराजे निंबाळकर

चारोळी

टाळलं तिने बरेचदा मला, मात्र
नाव माझं विसरू शकली नाही

ओठांना दटावून शांत केलं तिने
पण, मन ऐकतं का कधी काही

🥰 सागरराजे निंबाळकर

चारोळी

कितीदा टाळायचं नजरेला तुझ्या
कितीदा मी रस्ता वेगळा धरायचा

त्यागाला प्रेम म्हणालेलीस तू अन
आता आरोप, तू असं का करायचा?

🍃 सागरराजे निंबाळकर

चारोळी

दाह होईल काळजाला नकळत अन
ओलावतील जेव्हा पापण्यांच्या कडा

कळेल मग काय नातं होतं आपुलं
लागेल तेव्हा माझ्या अस्तित्वाचा छडा

🍃 सागरराजे निंबाळकर

लाखात एक माझी गोड परी (१४ अक्षरी गीत)

----- लाखात एक माझी गोड परी -----

दिसते लाखात एक, माझी गोड परी
गातो कवने मी जिची, अशी छंदाक्षरी !! धृ !!

नाव लाडक्या परीचे, ठेवले प्रचिती
लक्ष्मी सोन पावलांची, भाग्योदय किती
बोबड्या ह्या बोलातून, शब्द आई बाबा
क्षणार्धात घेतलेला, काळजाचा ताबा

माझ्या आनंदाची तीच, खरी मानकरी !! १ !!

सांग कधी बांधायचा, पत्त्यांचा बंगला
खेळ लपाछपीचा हा, कितीदा रंगला
घरी येताना आणता, लेमनची गोळी
घट्ट बिलगली मला, राणी साधीभोळी

कधी रागावते कधी, बळेच मस्करी !! २ !!

वेळ देत नाही मज, हीच तिची खंत
ऐक लाडे प्रपंचाला, नाही कधी अंत
देत जाईन यापुढे, वेळ हवा तसा
या धावून पटकन, मांडीवर बसा

रुसवा फुगवा बाळा, सोड आतातरी !! ३ !!

@ सागरराजे निंबाळकर, कल्याण

चारोळी

एरव्ही अंतर राखूनच, बोलणारी ती
आज चक्क, मला बिलगून रडत होती

तरीही मिठी न मारू शकलो, कारण...
घटना ही, निरोपाच्या क्षणी घडत होती

🍃 सागरराजे निंबाळकर 🍃

अवकाळी पाऊस (मुक्तछंद)

➖➖ अवकाळी पाऊस ➖➖

माहीत होत्या काही गोष्टी तरीही,
पर्वा न करता पुढे जात राहिलो.
ढग दाटलेले असताना छत्री न घेण्याचा हट्ट जसा...

ध्येय समोर दिसत होतं पण,
पूर्ण तयारीनिशी आलेलो नसल्याने माघार घ्यावी लागली.
श्वास चालू असतो पण घटका शेवटची असते तसंच काहीसं !

कधी खचून जायचो तर कधी वाटायचं,
पुन्हा एकदा प्रयत्न करून पहावा.
अवकाळी असला म्हणून काय झालं,
पाऊस तर आला !

सगळंच जर मनाजोगं झालं असतं तर,
काही मागायची आवश्यकताच नसती.
म्हणूनच विसरलो काही गोष्टी.
जन्म दिल्यावरही आई आणि बाळ मोठं झाल्यावरही आई, आईच असते तसं !

पुन्हा एकदा चालू लागतो त्या वाटेवर,
कोणी ओळखीचं भेटेल म्हणून, पण....
पाऊस असला तरी अवकाळी असतो तो.
नेहमी थोडेच येतो !

😊 सागरराजे निंबाळकर

चारोळी

आठवतंय मला बालपण आज
वाटतंय, त्याला कुठं जपून ठेवू

पुन्हा एकदा लहान होण्यासाठी
ये आई, आज एका ताटात जेवू

😊 सागरराजे निंबाळकर

चारोळी

कुणी साय म्हणतं तुला तर
कुणी म्हणतं, अखंड धागा

एकराहून मोठी वाटते मजला
आई तुझ्या कुशीमधली जागा

😊 सागरराजे निंबाळकर

चारोळी

जाणिवा नेणिवांचा प्रश्न हा
ऊन सावल्यांचा, खेळ नाही

जावं जिथे हजर तिथे तू
हा साधासुधा मेळ नाही

🍃 सागरराजे निंबाळकर

नशिबाच्या पुढे चालते कुणाचे (१४ अक्षरी गीत)

--- नशिबाच्या पुढे चालते कुणाचे ---

नशिबाच्या पुढे सांगा, चालते कुणाचे
चांगले वाईट सारे, समज मनाचे !! धृ !!

होता काही वेगळाले, देती त्याला दोष
त्यानेही कितीदा मग, ओढवावा रोष
हात पाय नाही ज्याला, त्याचेही नशीब
धडधाकट मग का, लावती रतीब

भाळी लिहिलेले आहे, भोग प्रत्येकाचे !! १ !!

साथ मज पदोपदी, नशिबाने दिली
विसरू कशी आईची, वेदना पहिली
साऱ्यास मिळाला येथे, मायेचा सहारा
नशिबाचा होता जेथे, अखंड पहारा

जुळाले अतूट पहा, धागे जीवनाचे !! २ !!

नशिबाला दोष नको, श्रद्धा ज्याची त्याची
शरदाच्या चांदण्यात, मूर्ती कैवल्याची
नशिबानेच मिळतो, अवघा प्रपंच
कामी येतो एकांतात, आठवांचा संच

नशीब दावते मज, दिवस सुखाचे !! ३ !!

@ सागरराजे निंबाळकर, कल्याण

चारोळी

जातो तिथे दृष्टीस पडते ती
असावेत बहुदा, योगायोग काही

विचारायचं असल्यास तिला विचारा
मला ह्यातलं काही, माहीत नाही

😊 सागरराजे निंबाळकर

चारोळी

ती जरी नसली आयुष्यात
तिची आठवण जपायला हवी

तिच्या लेखी मी कोण तीच जाणे
मात्र, लोक मला म्हणतात कवी

😊 सागरराजे निंबाळकर

चारोळी

आपण एकटेच जळत नसतो
सावल्यांनाही झळ लागते उन्हाची

जाब विचारल्यास वाईट वाटतं
असं विचारा, ही कृपा कोणाची?

😊 सागरराजे निंबाळकर

चारोळी

उत्तुंग शिखरावर जायचं असल्यास
वाटेत अडचणी, येतच असतात

अशावेळी मनाला समजवायचं असतं
अन्यथा, उगाच पाय अडून बसतात

🍃 सागरराजे निंबाळकर

चारोळी

वाट ओळखीची होती म्हणूनच
पाय अडखळणं, लागलं जिव्हारी

अगोदर वाटलं तोल गेला असावा
नंतर उमगलं, मी उभा तिच्या दारी

🍃 सागरराजे निंबाळकर

चारोळी

घुंगरांना दोषी कसं ठरवायचं राजे
ते एकमेकांवर आदळून तुटले होते

संयमाने घेतलं, तरच टिकतं नातं
हे कोडे जरा, उशीराच सुटले होते

😊 सागरराजे निंबाळकर

चारोळी

सगळं आलबेल सुरू होतं, पण
अचानक शेवटचा निरोप आला

प्रेमाखातर ओठांना डांबलं मी
तिला वाटलं अडसर दूर झाला

🍃 सागरराजे निंबाळकर

माझी लेक खूप गोड

➖➖ माझी लेक खूप गोड ➖➖

माझी लेक खूप गोड । जशी पेरूची ती फोड
सुखी संसाराला जोड । जन्म तिचा भाग्याचा !! १ !!

होता एक महिन्याची । घाई झाली बारश्याची
असे लाडकी साऱ्यांची । नाव ठेवा आनंदी !! २ !!

दुडूदुडू धाव घेता । हाक आई बाबा देता
तिला फिरावया नेता । होतो हर्ष अमाप !! ३ !!

घ्यावे शिक्षण अमाप । घडो हातूनी प्रताप
खंदा आहे तिचा बाप । स्वप्न पूर्ण कराया !! ४ !!

मोठी होई जशी जशी । सुवर्ण बावन्नकशी
तीच रवी तीच शशी । गर्व मजला तिचा !! ५ !!

हात होतील पिवळे । थाटामाटात सोहळे
कसा देऊ बळेबळे । सांगा निरोप तिला !! ६ !!

होवो संसार सुखाचा । पडो विसर दुःखाचा
क्लेश नकोच फुकाचा । कधी जीवनी तिच्या !! ७ !!

🍃🍃 सागरराजे निंबाळकर 🍃🍃

दुःखात एकटा मी (गझल)

➖➖ दुःखात एकटा मी ➖➖

दुःखात एकटा मी जमती सुखात सारे
हे शल्य बोचणारे मज शिकवतात तारे

येणार आज राया इतुका निरोप होता
आनंदल्या मनाने केले किती पसारे

दावून स्वप्न खोटे प्रेमातल्या मिठीचे
हातात ठेवले तू मुद्दाम हे निखारे

मजला नकोच काही सारे तुलाच घे तू
उघडीच ठेवतो मी सखये सताड दारे

लाटेस वाटले की सोडून सर्व गेले
झालेत आजवर का हे वेगळे किनारे

वाळूत काढलेल्या शिल्पास नाव देऊ
आहेत तेच अपुले नाजूकसे पिसारे

पाहून सावलीला मज प्रश्न एक पडतो
थकली असेल का ती घालून येरझारे

🍃🍃 सागरराजे निंबाळकर 🍃🍃

चारोळी

आपुल्यात रमलेला असतो जो तो
एकाची दुसऱ्याला पर्वा नाही

वेळ थोडाच आहे हातात आता
काय ते, लवकर ठरवा काही

🍃 सागरराजे निंबाळकर

रुबाई

डॉ. जार इल्लामी रुबाई वृत्त क्रमांक ११

गालगा लगागागा गागागा गा

प्रश्न रोजचा आयुष्याचा मजला
शल्य बोचणारे कुठवर साहावे

मी हसून टाळत जातो त्याला अन
सांगतो अता शांतीने राहावे

@ सागरराजे निंबाळकर

चारोळी

कापरासारखं असतं आयुष्य मित्रा
जाळताना स्वतःला, सांभाळ जरा

वैद्य मिळतीलही नंतर उपचाराला
मात्र, हा अपघात टाळलेलाच बरा

🍃 सागरराजे निंबाळकर

चारोळी

बजावलेलं तिला मी कैकदा
पस्तावशील मला सोडून गेल्यावर

नजरेचा खेळ म्हणून टाळतेस पण
जिव्हारी लागेल मी दुर्लक्ष केल्यावर

😊 सागरराजे निंबाळकर

रुबाई

डॉ. जार इल्लामी रुबाई :-

गालगा लगागागा गागागा गा

सूत्र एक हे माझ्या आयुष्याचे
मोजके परी आनंदाने जगतो

सोडले कधीचे मी चिंता करणे
आज मौज नंतरचे नंतर बघतो

🍃 सागरराजे निंबाळकर

चारोळी

संवाद साधावा तरी कुणाशी येथे
सारे आपापल्या आयुष्यात रमलेले

ताण दिला खूप तरीही ना आठवत
शेवटचे कधी सगळे एकत्र जमलेले

🍃 सागरराजे निंबाळकर

चारोळी

बरेचदा प्रयत्न केला सावरण्याचा
मात्र, कळत नकळत जातो तोल

वरवरचं दुखणं कसं म्हणावं ह्याला
हे शल्य तर अंतरात रुजलेलं खोल

🍃 सागरराजे निंबाळकर

चारोळी

मी चालायचं पुढेपुढे अन
तिने पाहायचं मागे वळून

विचारल्यावर कारण, म्हणाली
गंमत वाटते रे, असं छळून

😊 सागरराजे निंबाळकर

चारोळी

झोकून द्यावं स्वतःला इतुकं की
यशालाही आपुला वाटावा हेवा

पैसा अडका कामाचा नाही
कष्टाने साधली जाते ही सेवा

😊 सागरराजे निंबाळकर

चारोळी

करावया गेलो सांत्वन दुःखांचे
कडकडून त्यांनी मिठी मारली

आपलंसं केलं त्यांना कायमचं
ऋणानुबंध पाहून नियतीही भारली

😊 सागरराजे निंबाळकर

चारोळी

प्रयत्न केला मी ही छोटासा
     आयुष्याला जवळून बघण्याचा

तेजाने नेत्र दिपून गेले अन
     मिळाला नवा दृष्टिकोन जगण्याचा

😊 सागरराजे निंबाळकर

दो घडीचा पाहुणा

🍃        दो घडीचा पाहुणा       🍃

वाहता सुखाचे वारे । खळखळती किनारे
समाधानाचे निवारे । गवसतात जैसे !! १ !!

आयुष्याचा ठोकताळा । सांगतो संयम पाळा
वाढतो मग जिव्हाळा । उंच वेलीप्रमाणे !! २ !!

चारचौघात वावर । थांबा जरा क्षणभर
असले जरी नश्वर । सांगाडे आयुष्याचे !! ३ !!

दुःख देऊ नको कुणा । दो घडीचा तू पाहुणा
राहोत पाऊलखुणा । घे काळजी इतुकी !! ४ !!

गुज सागराचे आता । ऐकशील येता जाता
माय बाप अन त्राता । जगी साऱ्यांचा एक !! ५ !!

🍃 सागरराजे निंबाळकर 🍃

चारोळी

आपलं म्हणून सांभाळलं ज्याने
त्यालाच शिकवली, परकेपणाची कला

इथेच ठार झाली माणुसकी अन
कोसळला, एक माणूस भला

😊 सागरराजे निंबाळकर

चारोळी

कळल्या असत्या जर वेदना त्यांना
खरंच, माझ्याशी असं वागले नसते

मी ही खेळू दिलं भावनांशी मनसोक्त
कारण, थोडक्यात त्यांचे भागले नसते

😊 सागरराजे निंबाळकर

चारोळी

कुणाला आवडते तलम तर
कुणाला हवा सदरा खादीचा

शेवटी भावविश्व ज्याचे त्याचे
टाळूयात फक्त मोह गादीचा

@ सागरराजे निंबाळकर

वैधव्य

-- भांगेतलं कुंकू पुसावं लागतं --

भांगेतलं कुंकू । पुसावं लागतं
एकटं वाटतं । पती जाता !! १ !!

दोष तसा तिचा । नसतोच काही
यातना तिलाही । दुःख देती !! २ !!

सावरत तोल । पुढे पुढे जाते
आयुष्याशी नाते । घट्ट होता !! ३ !!

सांभाळते नित्य । कोवळ्या मुलांना
साजिऱ्या फुलांना । जीवापाड !! ४ !!

दुसरा विवाह । करू नये तिने
डाव नियतीने । आखलेला !! ५ !!

साहवत नाही । कांकणाचा भार
काळजाच्या पार । साद जाता !! ६ !!

फरपट होते । तिची कधीकधी
सुखासाठी संधी । शोधताना !! ७ !!

मृगजळासम । जाती सर्व दूर
जीवा हुरहूर । लावुनिया !! ८ !!

कशी विचारावी । व्याख्या वैधव्याची
वंचना नित्याची । भाळी जिच्या !! ९ !!

आस एक आहे । होवोत बदल
जगणे सफल । विधवेचे !! १० !!

@ सागरराजे निंबाळकर, कल्याण

चारोळी

का झाली निशब्द ती क्षणात
प्रश्न तसे माझे, फारसे नव्हते

डोळ्यात पाहिल्यावर उमगलं
कधीकधी व्यथेसही वाचा नसते

@ सागरराजे निंबाळकर

वसुंधरा

-- सढळ हाताने देई वसुंधरा --

वसुंधरा माझी । पुलकित झाली
गालावर लाली । येता आज !! १ !!

शृंगार अनोखा । हिरवळ सारी
लक्ष योनी तारी । आनंदाने !! २ !!

तीच माय बाप । तिजवीण काही
दुजा मार्ग नाही । सृष्टीलाही !! ३ !!

सढळ हाताने । देई वसुंधरा
सुख चराचरा । सदोदित !! ४ !!

न चुकता येती । सूर्याची किरणे
यथेच्छ फिरणे । धरेसवे !! ५ !!

पेरा मनोभावे । सृजनाचे बीज
करावया चीज । निसर्गाचे !! ६ !!

अंगावरी येती । गुलाबी शहारे
वाहताना वारे । थंडगार !! ७ !!

थांबवाया हवी । जमिनीची धूप
यावया हुरूप । जगण्याला !! ८ !!

काय वर्णावी मी । जैव विविधता
स्तुत्य सोशिकता । धरित्रीची !! ९ !!

जन्म आणि मृत्यू । मातीमध्ये होई
पालखीचे भोई । तिच्या सारे !! १० !!

कुशीत धरेच्या । ओढे, नदी, नाले
सागरा मिळाले । शेवटाला !! ११ !!

@ सागरराजे निंबाळकर, कल्याण

चारोळी

विशारद होतो एकेकाळी मी पण
आज तुला पाहता, गारद झालो

डोळ्यांनी कळवलं काळजाला सर्व
आळ मजवर, मीच का नारद झालो

😊 सागरराजे निंबाळकर

रुबाई

डॉ. जार इल्लामी रुबाई वृत्त क्रमांक ११

गालगा लगागागा गागागा गा

का कुचंबना करतो इतुकी मनुजा 
सार जीवनाचा सहजी जाणावा

हेत वेगळाला नाही ह्यामागे
हा तुझ्याच सत्संगाचा सांगावा

🍃 सागरराजे निंबाळकर 🍃