वारीत दुःखाचे | होवो विसर्जन
सुखावूदे मन | बा विठ्ठला ||१||
नाही माझ्या मनी | फार मोठी आस
होऊदे विकास | थोडा-थोडा ||२||
आहे मी विठ्ठला | चुकांचा पुतळा
लावतोस लळा | तरी मला ||३||
शांत होते मन | तुझ्या राऊळात
आधाराचा हात | जणू काही ||४||
नव्हती कधीही | चिंता प्रपंचाची
तुला पाहण्याची | ओढ फक्त ||५||
कळस पाहू की | पाहू मी पायरी
होतसे अंतरी | घालमेल ||६||
सागराच्या लाटा | जशा येती-जाती
तसा तू सांगाती | राहा माझ्या ||७||
🚩 सागरराजे निंबाळकर, कल्याण
