चारोळी

संकटांच्या वावटळीतून

सोडवावे स्वतःला प्रयत्नांनी

नको विचार पुन्हा-पुन्हा

किती, कसे छळले यातनांनी

😇 सागरराजे निंबाळकर

आयुष्याचे रूप आगळे

-- आयुष्याचे रूप आगळे --

आयुष्याचे रूप आगळे

आकळेना येथ कुणाही

सोडवावे कोडे कसे हे

पेच पडलाय मलाही

कधी हास्य खळखळून

कधी या आसवांच्या धारा

तरीही पीक वेदनांचे

पेरतोय येथ दुबारा

झाले-गेले विसरू आणि

चालू पुढेपुढे जरासे

तेवढ्यात टाकतो काळ

पुन्हा नवनवीन फासे

थकल्या-भागल्या जीवाने

आता, करावे तरी काय

ऐकेन यंदाही विधात्या

तूच सांग तरणोपाय

@ सागरराजे निंबाळकर, उल्हासनगर

चारोळी

सुखाचा शोध घेण्यासाठी

सहज वळून पाहिले मागे

मोहमायेच्या नादी लागून

दिसले, विस्कटलेले धागे

😇 सागरराजे निंबाळकर

कसे विस्मरावे

------- कसे विस्मरावे -------

(तुला वाटते का? मला आठवावे)

जरा वेळ काढून भेटून जावे

असो वा नसो जवळ माझ्या सये तू 

तुझे रुप मनी मी सदा साठवावे

कधी कौल देणार मजला प्रिये तू

किती घेत राहू असे हेलकावे

नमस्कार करतो कुणाला कशाला

तुझे तूच नोंदवुन घे बारकावे

तुझ्या हातची चव ग न्यारीच आई

तुझे वाढणे मी कसे विस्मरावे

😊 सागरराजे निंबाळकर

चारोळी

अबोला सोडून कायमचा

जोडला संवादाचा धागा

सहज व्यापली गेली मग

एकमेकांच्या काळजातली जागा

😇 सागरराजे निंबाळकर

चारोळी

सांभाळून चालावं जेवढं

तेवढा अधिक तोल जातो

म्हणूनच की काय गर्दीत

मी एकटाच मागे राहातो

😇 सागरराजे निंबाळकर

चारोळी

मनात खूप काही होतं

जे, ओठांवर आलं नाही

तसंही कुठे जमलं तुला

मला समजून घ्यायलाही

😇 सागरराजे निंबाळकर

चारोळी

मनात खूप काही होतं

जे, ओठांवर आलं नाही

तसंही कुठे जमलं तुला

मला समजून घ्यायलाही

😇 सागरराजे निंबाळकर

चारोळी

लाखो उपाय केले तरी

मूळ वेदनेचे, गवसले नाही

असह्य झाल्या यातना अन

डोळे माझे, झाले प्रवाही

😇 सागरराजे निंबाळकर

बाप

----- बापासम कोणी नाही -----

कोणी 'बाप' म्हणे । कोणी म्हणे 'तात'

स्थान जीवनात । सारखेच ।।१।।

भाऊ, पती, पिता । अशी कैक नाती 

सारी एकहाती । सांभाळतो ।।२।।

झाले कधी दुःख । जातो एकांतात 

न्हातो आसवांत । चिंब-चिंब ।।३।।

मुलगा-मुलगी । वाटती समान 

मायेला प्रमाण । नाही त्याच्या ।।४।।

बाप देतो जेव्हा । आम्हा आशीर्वाद 

सुखांचा निनाद । चोहीकडे ।।५।।

बापासम जगी । दुजा कोणी नाही 

वेगळाले काही । सांगू काय ।।६।।

@ सागरराजे निंबाळकर, उल्हासनगर 

मो - ८८७९८९७७९७

चारोळी

लावला गजर, पाहिली रोजनिशी

तरी आठवेना, पूर्वीचं काही

खंदा हकीमच हवा अशावेळी

चालत नाही, दाखवून कुणालाही

😇 सागरराजे निंबाळकर

मूहूर्त चोरट्यांचा

मूळ गीत :- 

रात्रीस खेळ चाले या गूढ चांदण्यांचा

गीतकार :- सुधीर मोघे

संगीतकार :- पंडित हृदयनाथ मंगेशकर

गायक :- महेंद्र कपूर

चित्रपट :- हा खेळ सावल्यांचा

वृत्तबद्ध गीत, वृत्त - आनंदकंद

विडंबन खालीलप्रमाणे :-

------- मूहूर्त चोरट्यांचा -------

रात्रीस खेळ चाले या धूर्त चोरट्यांचा

चुकणार ना कधीही मूहूर्त चोरट्यांचा ।।धृ।।

हा चोरटा शहाणा गुपचूप चोरतो हा

मी शांत झोपल्याचा मौकाच पाहतो हा

काळोख होय साक्षी उत्स्फूर्त चोरट्यांचा ।।१।।

जो साव वाटतो तो असतो खरा लुटारू

चोरून धावल्यावर कोणास मी पुकारू

हसतोय आज मजला हा मूर्त चोरट्यांचा ।।२।।

या नेमक्या क्षणाला का वीज रोज जाते

डोक्यात हीच शंका माझ्या सदा रहाते

थांबून शोध घेतो मी तूर्त चोरट्यांचा ।।३।।

@ सागरराजे निंबाळकर

चारोळी

खिळवून ठेवणं नजरेला

सयेला, चांगलंच जमायचं

म्हणून माझं चंचल मन

फक्त तिच्यातच रमायचं

💝 सागरराजे निंबाळकर

चारोळी

नाव ऐकलं तिचं की, आजही

तरळतात डोळ्यापुढे आठवणी

ओठ निशब्द होतात अचानक

एकमेकांना घट्ट बिलगते पापणी

➡️ सागरराजे निंबाळकर

लाजली तू

------- लाजली तू -------

कितीदातरी भेटली, हासली तू

मला पाहता साजणी लाजली तू

असे बोलणे मोकळे रोज माझे

उगा कावरी-बावरी जाहली तू

सये घेतला हात हाती तुझा मी

सुखाने अता सोबती चालली तू

सखे काळ राती मधू सोबतीला

इथे चांदवा मी, नभी गाजली तू

किती पेटवावे निखारे गुलाबी

तरी प्रेमपोळी जरा भाजली तू

@ सागरराजे निंबाळकर

चारोळी

आजन्म एकटा राहिलो परी

आज जमला पहा गोतावळा

बहुदा कोणीतरी मृत्यूचा माझ्या

केला असावा दैदिप्यमान सोहळा

😇 सागरराजे निंबाळकर

चारोळी

आजन्म एकटा राहिलो परी

आज जमला पहा गोतावळा

बहुदा कोणीतरी मृत्यूचा माझ्या

केला दैदिप्यमान सोहळा

😇 सागरराजे निंबाळकर

येणार सुकाळ

-- येणार सुकाळ --

आज अवचित

दाटले आभाळ

बहुदा सरींचा

येणार सुकाळ

थेंब नभातून

येता धरेवर

होतो जलदांनी

सुखी चराचर

ओलेत्या मातीचा

चोहीकडे गंध

प्रस्थापित करी

सौख्याचे संबंध

बिलगून जाते

वाऱ्याची झुळूक

खाणाखुणा जशा

राहूनिया मूक

अधूनमधून

दाटावे आभाळ

सुखी राहावया

सारे सर्वकाळ

@ सागरराजे निंबाळकर

चारोळी

कुणाला सुखावतात आठवणी

कुणाला जातात अलगद छळून

अनुभव आला मलाही तेव्हा

जेव्हा, पाहिलं मी मागे वळून

😇 सागरराजे निंबाळकर

गुरु करावा जीवनी

----- गुरु करावा जीवनी -----

एक तरी गुरु । करावा जीवनी

मिळे संजीवनी । चैतन्याची ।।१।।

गुरुविना नाही । शिक्षणा महत्व

जगण्याचे सत्व । त्यात सारे ।।२।।

बोट धरूनिया । पाय चालतात

माता आणि तात । आद्य गुरु ।।३।।

होते वाटचाल । योग्य मार्गावर

आनंदे, सुकर । गुरुंमुळे ।।४।।

गुरु असतात । ज्ञानाचा आगार

मानावे आभार । पदोपदी ।।५।।

अज्ञानास ज्ञान । देतसे अफाट

अंधारात वाट । दावी गुरु ।।६।।

गुरूंना नेहमी । द्यावा योग्य मान

ठेवोनिया जाण । संस्कारांची ।।७।।

आहे गुरुंमध्ये । त्रिमूर्तीचा वास

स्पर्श चरणास । करू त्यांच्या ।।८।।

राजा असो रंक । व्हावया विकास

हवा प्रत्येकास । गुरु एक ।।९।।

➡️ सागरराजे निंबाळकर, उल्हासनगर

मो - ८८७९८९७७९७

चारोळी

जमिनीचं करून अंथरूण

नभाला पांघरूण करावं

आयुष्य जमेल तेवढं

असंच साधं-सोपं जगावं

➡️ सागरराजे निंबाळकर

चारोळी

लाखोंशी भेट होते रोज, मात्र

लक्षात राहतो एखादाच चेहरा

गुंत्यातून वाचण्यासाठी मग मी

सांभाळतो काळजाला जराजरा

➡️ सागरराजे निंबाळकर

ज्ञानाचे मंदिर

-- ज्ञानाचे मंदिर --

लाल कौलारू छप्पर 

हिरवळ भोवताली

पंचक्रोशीमध्ये ख्याती 

माझ्या शाळेला मिळाली ।।१।।

माझ्या बोबड्या शब्दांना 

छान लागले वळण 

अशा पवित्र शाळेला 

माझे शतदा नमन ।।२।।

जिथे शिकलो मांडाया 

आयुष्याचा ठोकताळा 

गुरु रूप आचार्यांचे

गुरुकुल माझी शाळा ।।३।।

लळा लावून मुलांना 

गुरु होती माय-बाप 

त्यांच्या कृपेच्या छायेत 

सुख मिळते अमाप ।।४।।

शाळा ज्ञानाचे मंदिर 

शाळा नव्हे फक्त वास्तू 

आशीर्वच देऊनिया 

गुरु म्हणती तथास्तु ।।५।।

@ सागरराजे निंबाळकर, उल्हासनगर 

मो - ८८७९८९७७९७