काय नेमके

काय नेमके, असेल कारण

सावलीतही, ऊन भासते

जवळ करेना, आज मला ती

एरव्ही जसा, जीव लावते

~ सागरराजे निंबाळकर

सवलत द्यावी

वाटत आहे, आता सारखे

दुःखाने या, सवलत द्यावी

रात्र जशी ही, शीतल असते 

सकाळसुद्धा, तशीच यावी

~ सागरराजे निंबाळकर

पत्र निनावी

~ पत्र निनावी 

आयुष्याच्या, वाटेवरती

पडझड कायम, होतच असते 

सावरण्याला, पुन्हा नव्याने

केवळ थोडे, धैर्य लागते

हरूनही जो, जिंकत जातो

सलाम करते, दुनिया त्याला

भाग्यासोबत, कर्मही हवे

ध्येय गाठतो, कळते ज्याला

रडणे-हसणे, पडणे-उठणे

आयुष्याचा, खेळ निराळा

आनंदाला, कवेत घ्या अन् 

दुःखाला या, नकळत गाळा 

छळले जर का, एकांताने 

विविध रसांची, गाणी गावी

हवा कशाला, पत्ता कुठला

लिहू एकदा, पत्र निनावी

~ सागरराजे निंबाळकर

एक कोपरा

एक कोपरा, काळजातला

तुझ्याचसाठी, होतो हळवा 

क्षणात असतो, तप्त उन्हाळा

क्षणात होतो, वसंत हिरवा

~ सागरराजे निंबाळकर