🔰 येतो फिरून काशी..
दुःखात रोज माझ्या पडतेय भर जराशी
काबा बघून झाला येतो फिरून काशी
मज़हब कधी कुणाचा वाईट सांगतो का?
थांबा अता गड्यांनो का खेळता जिवाशी
रेषा पुसून गेल्या आले न यश तरी, मग..
ताब्यात घेतला मी तो चंद्र आणि राशी
काट्याकुट्यांमुळे मी वैरी असेनही पण..
मैत्री कमाल करतो बागेतल्या फुलांशी
दुर्लक्ष खूप करतो दिवसा कसेबसे पण..
हितगूज रोज होते रात्रीस वेदनांशी
गर्दीमुळे निवडला एकांत मीच माझा
'राजे' तुम्हीच सांगा बोलू कसा कुणाशी
😊 सागरराजे निंबाळकर, उल्हासनगर
