उभारू गुढी

🚩 उभारू गुढी..

चल उभारू गुढी एकतेची सदा

जात धर्मातली टाळण्या आपदा

कर्म कर चांगले ठेव हेतू भला

पाहिजे सौख्य जर जीवनी सर्वदा

मोकळे यायचे मोकळे जायचे

का हवी मग तुला एवढी संपदा

सोड "माझे-तुझे" भेद आतातरी

भांडणाचा नसे एकही फायदा

"दीप" होऊन तू तेज साऱ्यास दे

जन्म मनुजा असा लाभतो एकदा

🌿 सागरराजे निंबाळकर, कल्याण

मो - ८८ ७९८९ ७७९७

राख शेवटी हाती

➡️ राख शेवटी हाती..

कधी कुणाची, सुटेल सोबत

नेम जराही नाही

असले-नसले, सर्व सारखे

खेद न उरला काही

समीप आलो, म्हणता-म्हणता

अंतर वाढत जाते

असेल माझे, दुर्दैवाशी

युगायुगांचे नाते

हरलो, पडलो, सावरलोही

करून हिंमत गोळा

पाठ सोडते, दुःख कुठे पण

पडतोच पुन्हा डोळा

डोळ्यादेखत, विरते सगळे

राख शेवटी हाती

कसे कळावे, जाणारे मग

कुण्या दिशेला जाती

खेळ निराळे, नशिबाचे हे

डोक्यावरून सगळे

शरीरयष्टी, असते नश्वर 

जीवन अवघे ढगळे

बाजू अपुली, पुढच्यावेळी

पुन्हा एकदा मांडू

जगतो तोवर, आयुष्याशी

खोटेनाटे भांडू

🌿 सागरराजे निंबाळकर, कल्याण

अभिनय

➡️ अभिनय..

"अभिनय" खरा असो किंवा खोटा, उत्तम करा साहेब.

काही वर्षांपूर्वी स्पॉटबॉय म्हणून काम करणारा विनीत चित्रपटाच्या नायकाला सांगत होता..

😇 सागरराजे निंबाळकर

निखळ भावना

🌺 निखळ भावना..

जगाचे कल्याण । करी जो संत

कृपाळू अनंत । तोचि खरा ।।१।।

आहे निरर्थक । सारी मोहमाया

स्वप्न साकाराया । कष्ट हवे ।।२।।

क्षणिक विश्रांती । देते फार बळ

नको हळहळ । त्रागा उगा ।।३।।

व्हायचे ते होते । येता योग्यवेळ

नको ताळमेळ । ओढूनिया ।।४।।

अपुल्या वाटेचे । कुठे जात नाही

नको चिंता काही । रात्रंदिन ।।५।।

प्रार्थनेसोबत । श्रद्धा हवी फक्त

दिसती सशक्त । परिणाम ।।६।।

साधे आचरण । निखळ भावना

सफल योजना । पदोपदी ।।७।।

🌿 सागरराजे निंबाळकर, कल्याण

मो - ८८ ७९८९ ७७९७

खूप साधे तरी

▪️खूप साधे तरी..

प्रश्न होते तसे खूप साधे तरी

का बरे टाळली उत्तरे तू खरी

शक्यतांना तुझ्या वाव होता कुठे

मीच ओलांडली शेवटी पायरी

का उगा एवढा लोभ आहे तुला

काय नेणार तू ईश्वराच्या घरी

मांडल्याने कधी संपते का व्यथा

राहते नेहमी वेदना अंतरी

एक पाऊल तू फक्त आला पुढे

आणि नात्यातली संपली बघ दरी

घेतली धावती भेट गेल्या पुढे..

पाहुण्यासारख्या वागल्या या सरी

काय सांगू "किरण" कोण होतास तू

मुक्तछंदात तू तूच अल्पाक्षरी

🌿 सागरराजे निंबाळकर, कल्याण

एका घरात आली

गीत - "एका तळ्यात होती"

गीतकार - ग. दि. माडगूळकर

▪️एका घरात आली.. (विडंबन)

एका घरात आली, मुलगी अती सुरेख

जमले तिला बघाया, मजनू क्षणात कैक ।।धृ।।

कोणी दिली चमेली, कोणी गुलाब, चाफा

कळले तरी कुणा ना, आल्या कुठून वाफा

पाहून खेळ सारा, दमले हसून लोक ।।१।।

मजनूस दुःख झाले, मग कोंडले स्वतःला

सर्वांस ही विनंती, सांगू नका कुणाला

जो तो बघून लपतो, बसला उरात धाक ।।२।।

एकेदिनी कळाले, आली नवीन कोणी

डोळे निळे तिचे अन्, दिसते दुधाळ लोणी

जवळून पाहताना बसली हळूच एक

नजरेसमोर अमुच्या झाला पुन्हा रिटेक ।।३।।

🌿 सागरराजे निंबाळकर, कल्याण

मो - ८८ ७९८९ ७७९७