सागराचा वाटा (षोडशाक्षरी)

---------      सागराचा वाटा      ---------

येता जाता हट्ट तिचा, आणा बाजूबंद राया
क्षण आनंदाचा ऐसा, कसा जाऊ देऊ वाया

नथ नाकात शोभते, पायी चांदीचे जोडवे
नितदिन गातो आता, माझ्या सयेचे गोडवे

कसा वर्णावा कळेना, थाट न्यारा डोरल्याचा
लाजताना होतो भास, नजरेने ओढल्याचा

घेता कुशीत प्रियेला, आड येते एक बट
करंगळी होते सज्ज, उधळाया तिचा कट

गुज साधता डोळ्यांनी, ओठ करती इशारा
मधुचंद्र साधावया, देती चांदण्या पहारा

ओठ ओठात गुंतता, सखी होते लालबुंद
विसरून सारे भान, होतो दोघेही बेधुंद

शंख, शिंपले जन्माया, आहे सागराचा वाटा
कुणा कळते किनारी, कशा आदळती लाटा

🍃🍃 सागरराजे निंबाळकर 🍃🍃