स्वागत आहे

🫱🏻‍🫲🏻 स्वागत आहे..

करू नको तू माझ्यानंतर जवळ कुणाला 

तुझाच होतो तुझाच आहे सांग जगाला

कधी न झाली एकमताने चर्चा अमुची

शत्रूत्वाचा मात्र "सारखा" शाप मिळाला

जमेल तेव्हा यावे, जावे स्वागत आहे

नाही माझ्या तसे कुठेही दार घराला

कट्टरतेची व्याख्या म्हणजे "शंभूराजे"

झुकले नाही जरी लागले प्राण पणाला

कशी लिहावी गझल नेमकी शिकतो आहे

कधी ना कधी भिडेल माझा शेर मनाला

🌿 सागरराजे निंबाळकर, कल्याण

मो - ८८ ७९८९ ७७९७

आयुष्याची नाव

🌺 आयुष्याची नाव

पुन्हा एकदा मी | निरुत्तर झालो

फिरूनिया आलो | त्याच जागी ||१||

चुकतो का फेरा | जन्म-मरणाचा

आशा-अपेक्षांचा | खेळ सारा ||२||

कितीही मिळाले | समाधान नाही

राहतेच काही | खंत मनी ||३||

हवे तेवढेच | घ्यावे ताटातून

लोभ मागाहून | नको उगा ||४||

चोचले जिभेचे | असतात फार

मानू नये हार | तिजपुढे ||५||

घ्यावा एकाजागी | थोडासा विसावा

व्यर्थ आहे धावा | सुखामागे ||६||

किनारी लागेल | आयुष्याची नाव

ठेव योग्य भाव | अंतरात ||७||

🌿 सागरराजे निंबाळकर, कल्याण

खोपा

🌿 खोपा..

घडायचे ते घडून जाते

नसते काही हाती

करत रहा तू प्रवास पुढचा

जोडत नवीन नाती

अपुला-परका भेद कशाला

सारे कवेत घ्यावे

उरले-सुरले नकोच काही

ज्याचे त्याला द्यावे

सदा परीक्षा बघते नियती

सोंग नव्याने घेते

कुणी कफल्लक, कुणास अगदी

ओंजळ भरून देते

आहे त्यातच सुखी रहावे

नियम करावा सोपा

नको ईश्वरा महाल मोठा

दे छोटासा खोपा

🌿 सागरराजे निंबाळकर, कल्याण

ओंजळ

🌺 ओंजळ..

कधी न कळले कशी अचानक

भुरळ मनाला पडते

ठरवतो एक करायचे पण..

दुसरे काही घडते

कसा सोडवू पेच असा मी

सर्व सावळा गोंधळ

तृप्त होणार इतक्यात पहा

पुन्हा रिकामी ओंजळ

🌿 सागरराजे निंबाळकर, कल्याण

करावे चिंतन

🌿 करावे चिंतन..

कोणत्याही क्षणी । काहीही घडते

हातात नसते । वेळ कधी ।।१।।

"जर-तर" गोष्ट । शक्यतो टाळावी

जाऊ नये गावी । भाकितांच्या ।।२।।

कुवत अपुली । स्वतः ओळखावी

कल्पना निनावी । कशापायी? ।।३।।

अति चंचलता । संकटात नेते

पदोपदी देते । धडा मोठा ।।४।।

अर्धवट ज्ञान । उथळ स्वभाव

दावतो अभाव । स्थिरतेचा ।।५।।

दिसामाजी थोडे । करावे चिंतन

स्थिरावते मन । एकाजागी ।।६।।

आयुष्य म्हणजे । अथांग सागर

भरावी घागर । सत्कर्मांनी ।।७।।

🌿 सागरराजे निंबाळकर, कल्याण