कुणाला आपले मानू कुणाशी हात मिळवू मी
भला, दुर्जन खरे-खोटे कसे अन् काय ठरवू मी
उभा हा जन्म गेला पण.. तुझे अस्तित्व दिसले ना
कसा आशेवरी राहू कशाचे स्वप्न सजवू मी
हवे आहे तुला जे-जे निवड, घेऊन जा सारे
तुझ्यापासून काहीही कशाला आज लपवू मी
मला सांगायचे होते तुला कळलेच नाही ते
धडा मग शक्यतांचा हा कितीदा सांग गिरवू मी
तुला ऐकायचे म्हणजे अनोखी पर्वणी आहे
तुझ्यासाठी गझल, कविता कुण्या चालीत बसवू मी
😊 सागरराजे निंबाळकर, कल्याण
