दिग्दर्शक मी

▪️ दिग्दर्शक मी..

लाख तालीम, करूनही का

पात्रे सगळी, उघडी पडली

भूमिका तशा, सोप्या होत्या

जमली नसेल, अदलाबदली

दिग्दर्शक मी, कथानकाचा

हवा तसा मग.., शेवट केला

प्रयोग झाला, पडला पडदा

जो-तो अपुल्या, वाटे गेला

🌿 सागरराजे निंबाळकर, कल्याण

ऐकू येतो

नकोस हासू, समोर येता

खोटेनाटे, बघून मजला

दाबला जरी, ऐकू येतो

कल्लोळ तुझ्या, अंतरातला

🌿 सागरराजे निंबाळकर

माय मराठी

🌺 माय मराठी..

माय मराठीचा | करूया जागर

ज्ञानाचा सागर | ज्ञानेश्वरी ||१||

काना, मात्रा आणि | वेलांटी, उकार

कोवळी दुपार | कवितेची ||२||

गदिमांची गीते | भटांची गझल

मारते मजल | चोहीकडे ||३||

तुका, जना, नामा | सखा पांडुरंग

रुळले अभंग | ओठांवर ||४||

शहाजी, जिजाऊ | शिवबा, संभाजी

शौर्यगाथा ताजी | युगेयुगे ||५||

भीमाची लेखणी | देतसे आधार

मानू उपकार | नित्य त्यांचे ||६||

सावरकरांचा | पहाडी पोवाडा

हिंदुत्वाचा पाढा | तोंडपाठ ||७||

लेख टिळकांचे | "स्वराज्य" मागती

काळजा भिडती | शब्द-शब्द ||८||

मराठी मातीत | कितीतरी रत्न

करूया प्रयत्न | जपण्याचा ||९||

माय मराठीची | उंच राहो मान

गातो गुणगान | मनोभावे ||१०||

🌿 सागरराजे निंबाळकर, कल्याण

मो - ८८ ७९८९ ७७९७

शोधावा उपाय

🌺 शोधावा उपाय..

स्वभावाविरुद्ध । वागून कैकदा

टळते आपदा । कधी कुठे? ।।१।।

स्वतःच्या विश्वात । रममाण व्हावे

प्रवासा निघावे । एकांताच्या ।।२।।

सुफळ संपूर्ण । होत नाही काम

कसे चारीधाम । फिरू मग? ।।३।।

एकसारखीच । प्रत्येकाची खंत

नाही जिला अंत । जीवनात ।।४।।

जे काही होईल । चांगले म्हणावे

सदैव चालावे । पुढे-पुढे ।।५।।

आपला आपण । शोधावा उपाय

कर्माणि सुखाय । बाकी शून्य ।।६।।

आशेचा "किरण" । सुखाचा "सागर"

एक झाल्यावर । होतो मोद ।।७।।

🌿 सागरराजे निंबाळकर, कल्याण

तुझ्यामुळे मी..

▪️तुझ्यामुळे मी..

पाणी असून डोळ्यामध्ये हसलो होतो

तात्पुरता का होईना पण.. खचलो होतो

वर्षामागे वर्षे गेली तरी न खुलले

बनून याचक ज्या दाराशी बसलो होतो

चकवा समजा, विसराळू वा गुंग मतीचा

तिथेच आलो जिकडे पूर्वी फसलो होतो

विजय साजरा केला ज्यांनी सांगा त्यांना

हरलो नाही बस थोडासा थकलो होतो

शिक्षण होते, बुद्धी होती, तरी सांगतो

आई केवळ तुझ्यामुळे मी घडलो होतो

🌿 सागरराजे निंबाळकर, कल्याण

सागर व्हावे..

🐋 सागर व्हावे..

सागर व्हावे, जगणे माझे

फेसाळू दे, असंख्य लाटा

थोडे वरती, थोडे खाली

तरी शेवटी, नाही घाटा

जरी चवीला, असला खारट

त्याच्याशिवाय, नाही रंगत

शंख शिंपले, सफेद वाळू

जणू भोजना, बसली पंगत

🌿 सागरराजे निंबाळकर, कल्याण

शल्य उराशी

▪️शल्य उराशी..

वापरले मज, ज्याने-त्याने

उडवत खिल्ली, विश्वासाची

मला न कळले, डावपेच मग..

कशास निंदा, करू कुणाची

होते नव्हते, गमावले मी

आज कफल्लक, म्हणतो जो-तो

वाटेल खरे, कसे कुणाला

एकेकाळी, राजा होतो

वैभव गेले, लज्जा गेली

त्याची मजला, चिंता नाही

लुटणाऱ्याला, सलाम आहे

थरथरले ना, हात जराही

जगतो आहे, जपून आता

पराभवाचे, शल्य उराशी

एक मागणे, तुला मागतो

नको ईश्वरा, खेळ जिवाशी

🌿 सागरराजे निंबाळकर, कल्याण

भेट घेत जावी

🌿 भेट घेत जावी

भेट तुझी होता । मिळतो आधार

कमी होतो भार । निराशेचा ।।१।।

किमया करते । फक्त एक भेट

आलिंगन थेट । देता कोणी ।।२।।

प्रत्यक्ष भेटीचा । आनंद निराळा

मिळतो उजाळा । भावनांना ।।३।।

शक्य तितक्यांदा । भेट घेत जावी

संवाद प्रभावी । होतो त्याने ।।४।।

भेट तुझी आता । पुन्हा कधी राणी

डोळ्यातले पाणी । विचारते ।।५।।

कुणास ठाऊक । शेवटची भेट

घडावा समेट । सलोख्याने ।।६।।

▪️सागरराजे निंबाळकर, कल्याण

देईल तो साथ

🌿 देईल तो साथ..

ऋण मातीचे फेडाया

उभा जन्म खर्ची केला

घास उरला-सुरला

पावसाने तोही नेला

पुन्हा केली मशागत

दुःख लपवून आत

याच आशेवर एका

यंदा देईल तो साथ

▪️सागरराजे निंबाळकर

तऱ्हा निराळी

प्रत्येकाची तऱ्हा निराळी

क्षणाक्षणाला मनास जाळी

परंपरेच्या ओझ्याखाली

दबणे आहे कायम भाळी

मुलगी अखेर व्यक्ती असते

भेद कशाला गोरी-काळी

आलिंगन तर गोष्ट लांबची

दिली न त्यांनी साधी टाळी

ऐपत नव्हती म्हणून होतो

उभा कधीचा पाहत थाळी

येते-जाते दारी माझ्या

ऊन-सावली सांजसकाळी

🌿 सागरराजे निंबाळकर

मला काय मिळालं

▪️मला काय मिळालं..?

पाखरू एक, आलं तसं निघालं

शेवटी, मला काय मिळालं..? ।।धृ।।

सुखदुःखे सारी, आपली मानली

कळत-नकळत, प्रीत वाढली

कधी मी कधी ती, पुढे आलो

सहज क्षणात, एकमेकांचे झालो

वाचून डोळे, मनातलं

न सांगताही, सर्व कळालं ।।१।।

हळूहळू, होत राहिली सलगी

कधी प्रेम कधी, वादाची ठिणगी

नजरेत आल्या, चुका काही

प्रयत्न सलोख्याचे, मी सोडले नाही

हिरवंगार, शिवार प्रेमाचं

माझ्या, नजरेदेखत जळालं ।।२।।

वाटलं तेव्हा, केलं जवळ-दूर

खात राहिली, जीवाला हुरहूर

वापर राजाचा, खुबीने केला

चेहरा हसरा, झाला रडवेला

कशा पुसायच्या स्मृती आणि..

कसं म्हणावं, झालं ते झालं ।।३।।

पैशापुढे प्रेमाला, किंमत नसते

खरेपणावर दुनिया, मिश्किल हसते

असतात खोट्या, शपथा, आणाभाका

कुठवर मारायच्या, केविलवाण्या हाका

पैशाने मिळतं, हवं ते सारं

थोडं उशिराच, ध्यानात आलं ।।४।।

🌿 सागरराजे निंबाळकर

गरज असते जेव्हा..

गरज असते नितांत जेव्हा

नेमकी तेव्हाच साथ सोडते

बाहेर पडावं भोवऱ्यातून जेवढं

नियती तितकंच आत ओढते

🌿 सागरराजे निंबाळकर