खुशाली

▪️खुशाली..

मी दिवा तू वात झाली

रात्र ही तेजात न्हाली

चिंतनाचा हट्ट धरला

स्थैर्यता डोळ्यात आली

पाहुणा मी दो घडीचा

काय सांगावी खुशाली

एकटा पडलो कधी जर..

अक्षरे होतात वाली

युद्ध आहे संकटांशी

आसवांच्या सार ढाली

▪️सागरराजे निंबाळकर

भेटीस फक्त एका

ज्येष्ठ गझलकार मसूदभाई पटेल यांनी दिलेल्या ओळीवरून तरही गझलचा एक प्रयत्न :-

~~ भेटीस फक्त एका..

(शहरात रोज वणवण फिरतो तुझ्या अजूनी)

भेटीस फक्त एका मुकतो तुझ्या अजूनी

साऱ्या जगात आहे तू वेळ वाटलेली

यादीत मात्र मी या नसतो तुझ्या अजूनी

मी कृष्ण सावळा अन् तू राधिका मयूरी 

वृंदावनात पावा घुमतो तुझ्या अजूनी

समजू नको मला तू परका कधीच राणी

आयुष्य रोज नावे करतो तुझ्या अजूनी

येशील तू पुन्हा ही आशा मनात भोळी

दारात वाट पाहत बसतो तुझ्या अजूनी

समशेर चालवाया आले किती नि गेले

शिवबा पराक्रमाला स्मरतो तुझ्या अजूनी

आवाज हुंदक्यांचा केला हळू जरी तू

डोळ्यात रोज "सागर" दिसतो तुझ्या अजूनी

▪️सागरराजे निंबाळकर, कल्याण

आजही

_~~ आजही.._

_मज दिलेला शब्द जेव्हा मोडला तू_

_घाव माझ्या काळजावर गोंदला तू_

_जर तुला जमणार नव्हते साथ देणे_

_का उगा मग जीव इतका लावला तू_

_आजही रेंगाळतो आई जिभेवर.._

_घास मायेने मला जो भरवला तू_

_उंट, घोडे ठेवले शाबूत अगदी_

_नेमका राजा चुकीने गमवला तू_

_चिंतनाचा स्त्रोत आहे शेर म्हणजे_

_कर खुबीने आपलेसे गजलला तू_

🫶🏻 _सागरराजे निंबाळकर, कल्याण_

जपता तुला न आले

~ _जपता तुला न आले.._

_दोघातल्या दरीला भरता तुला न आले_

_नाते तुझे नि माझे जपता तुला न आले_

_सर एक श्रावणाची थांबून फार होती_

_आलीस तू उशीरा भिजता तुला न आले_

_चारी दिशांत फिरली शोधायला मला तू_

_मी काळजात होतो.. बघता तुला न आले_

_कल्लोळ फार केला डोळ्यात आसवांनी_ 

_खोटे, खरे कसेही हसता तुला न आले_

_पोटात भूक होती नजरेत पेच मोठा_

_डोळे मिटूनही मग.. निजता तुला न आले_

🫶🏻 _सागरराजे निंबाळकर, कल्याण_

सुरुवात आहे

~ सुरुवात आहे..

काळजाच्या आत आहे

केवढा आघात आहे

ठाव ना माझे मलाही

मी किती वादात आहे

दुःख बाबा शल्य आई

वेदना अभिजात आहे

मानले निर्दोष सगळे

मग कुणाचा हात आहे

ध्येय आहे लांब अजुनी

फक्त ही सुरुवात आहे

🫶🏻 सागरराजे निंबाळकर

धीर

~ धीर कमी ना व्हावा..

स्पर्धेमधून, आयुष्याच्या

माघार कशी घ्यावी

लक्ष्मणरेषा, ज्याची त्याने

लिलया ओलांडावी

हार जीत वा, येवो संकट 

धीर कमी ना व्हावा

लळा लावला, जर दुःखाला

घुमतो सुरेल पावा

😊 सागरराजे निंबाळकर

उरेल का मग

~~ उरेल का मग..

अधूनमधून, येते झुळूक 

हळूच निघून जाते

झाले आहे, प्रत्येकाचे

असेच काही नाते

झरा आटला, नात्यामधला

संपत आहे माया

कधी न कळले, गेली इतकी

वेळ कशाने वाया

गुरफटलेला, दिसतो जो-तो

श्वास मोकळा नाही

शंका येते, उरेल का मग..

हातामध्ये काही?

★ सागरराजे निंबाळकर