(बैठकीची लावणी)
सोनं-चांदी नको राया, फक्त तुम्ही यावे
घडीभर का होईना, शेजारी बसावे ||धृ||
तुम्हाविना जगण्यात, नाही काही राम
तुम्हीच पंढरी माझी, तुम्ही चारीधाम
गूज मनातले माझ्या, तुम्हाला कळावे ||१||
नथ, राणीहार, ठुशी नकोशी वाटते
जेव्हा आरशासमोर, उभी मी राहते
फुल तरी सांगा राया, कसे मी माळावे ||२||
आठवते रात्रंदिन, शेवटची भेट
गेलात निघून तुम्ही, रागापायी थेट
पुरे की हो राया किती, काळीज जाळावे ||३||
अखेरचे श्वास माझे, मोजती घटका
किस्सा ऐकवा एखादा, हलका-फुलका
डोळे मिटता-मिटता, वैकुंठ दिसावे ||४||
@ सागरराजे निंबाळकर, कल्याण
मो - ८८७९८९७७९७
