वृत्त :- कलिंदनंदिनी
🌺 पुरे तुझे न चोचले..
तुला पहावया सुखी, अमाप दुःख भोगले
तरी अजून जीवना, पुरे तुझे न चोचले
घडीत ग्रीष्म पोळतो, घडीत मेघगर्जना
कळेचना ऋतू कुण्या, दिशेत आज चालले
तुझ्याविना कसेबसे, जगून घेतले सख्या
कधी न शल्य मांडले, कुठेच मी उरातले
अनाथ बालकांपरी, असे किती जगायचे
प्रभू कृपेत सौख्य दे, मला पुन्हा घरातले
कवेत घेतले सदा, जपून आपलेपणा
म्हणून या गुणामुळे, अनेक मित्र भेटले
उरात दाटली व्यथा, छळावया अनेकदा
न थांबता पुढेच मी, सदैव पाय टाकले
तरंग सागरातले, किनार गाज ऐकती
अबोल मी अबोल तू, निशब्द विश्व आपले
🌿 सागरराजे निंबाळकर, उल्हासनगर
