-- माझं सासर माहेर --
माझ्या माहेराची शान
माझी कनवाळू आई
तिचे हसरे वदन
जशी फुले जुई, जाई !! धृ !!
मिठी सुटेनाच काही
तिने जवळ घेताना
लाखो हुंदके दाटले
तिला निरोप देताना
होते लाडाची छकुली
आज झाले, मोठी बाई !! १ !!
सासऱ्यांनी हाक देता
मज वाटे बाबा आले
प्रेम सासूचे पाहून
त्यांची मुलगीच झाले
एकजीव झालो आम्ही
जशी लेखणीची शाई !! २ !!
दुवा मायेच्या नात्यांचा
माझं सासर, माहेर
कैक सुखाच्या क्षणांचा
मला मिळाला आहेर
ऋण साऱ्यांचे एवढे
कशी होऊ उतराई !! ३ !!
@ सागरराजे निंबाळकर
No comments:
Post a Comment
आपल्या अभिप्रायाबद्दल मनःपूर्वक आभार !