रामकृष्ण हरी

------ राम कृष्ण हरी -----
         (६-६-६-४)

राम कृष्ण हरी । साधा सोपा मंत्र
जगण्याचे तंत्र । शिकवितो !! १ !!

शिकवितो तुका । नामा, ज्ञाना, जना
शांती लाभे मना । राऊळात !! २ !!

राऊळात सारे । दंग वारकरी
अवघी पंढरी । जल्लोषात !! ३ !!

जल्लोषात टाळ । मृदुंगाचा नाद
मनामना साद । श्रीहरीची !! ४ !!

श्रीहरीची सेवा । केली मनोभावे
पाविजे स्वभावे । प्रत्येकाला !! ५ !!

प्रत्येकाला येथे । मिळतो स्वानंद
सुखाचा तो कंद । जगताना !! ६ !!

जगताना नित्य । शिकावे अध्यात्म
संतांचे महात्म्य । चिरकाल !! ७ !!

चिरकाल जेथे । विठूचा निवास
जीवाचा विकास । होतो सदा !! ८ !!

होतो सदा लीन । अथांग सागर
भक्तीचा जागर । पंढरीत !! ९ !!

@ सागरराजे निंबाळकर