वृत्तबद्ध अष्टाक्षरी (जीवन संगीत)

वृत्त :- पादाकुलक १६ मात्रा [८+८]

-- *आयुष्याच्या संगीताने* --

आयुष्याच्या संगीताने
गातो माझे न्यारे गाणे
सत्कर्माच्या आनंदाने
सोपे होते येणे जाणे

एका हाती घ्यावे द्यावे
ज्याचे त्याचे ज्याला त्याला
जोडू आता नात्यांची ही
साधी सोपी मोठी माला

अंधाराला त्यागूनीया
लावू दारी लाखो वाती
थारा नाही दुःखा येथे
आनंदाने सारे गाती

व्यासंगाच्या वाटांनाही
सांभाळावे लाडेगोडे
संगीताची व्याप्ती मोठी
तालाचेही वाटे कोडे

माझे माझे केले ज्याने
झाला त्याच्या जीवा त्रागा
साध्या मार्गे व्यापावी ही
प्रारब्धाची सारी जागा

सूरांनाही लागो गोडी
वाजू द्यावा सारेगामा
याची देही याची डोळा
पाहू आता चारी धामा

--- *सागरराजे निंबाळकर* ---