सत्तेचा अभंग

_____ *सत्तेचा अभंग* _____

कैक आले येथे । आणि कैक गेले
कोणी काय केले । सांगा आता !! १ !!

साऱ्यांनाच हवी । ती खुर्ची सत्तेची
सुपारी हत्येची । जनतेच्या !! २ !!

गातात मिळूनी । सत्तेचा अभंग
मोजण्यात दंग । देणगी ती !! ३ !!

पद वाटपात । मुख्यमंत्री हरी
बाकी वारकरी । पालखीचे !! ४ !!

रखुमाईला ही । हव्या काही जागा
मंडळाचा धागा । बांधावया !! ५ !!

खेळ असा सारा । इंद्रही पाहती
यथेच्छ नाहती । मनोभावे !! ६ !!

साधावया सारे । करतात युती
लाभे फलश्रुती । सांगडीने !! ७ !!

अशा ह्या खेळात । केंद्रस्थानी सत्ता
आर्थिक सुबत्ता । मिळवाया !! ८ !!

वर्षानुवर्षे हा । होतसे पसारा
मारुनी फवारा । साफ खुर्ची !! ९ !!

_____ *सागरराजे निंबाळकर* _____