वाट जीवनाची अभंग

------- *वाट जीवनाची* -------

वाट जीवनाची । कुणा कुठे नेते
खूप काही देते । जगताना !! १ !!

जगताना होतो । कैकदा आभास
सारे आसपास । असल्याचा !! २ !!

असल्याचा ताव । नसल्याचा आव
मुखावरी भाव । वेगळाले !! ३ !!

वेगळाले असे । गवसते काय
दोन हात पाय । साऱ्यांनाच !! ४ !!

साऱ्यांनाच कुठे । कळतो हा देव
सुखांची ही ठेव । अनमोल !! ५ !!

अनमोल आहे । जीवनाची वाट
न्यारा थाटमाट । जगण्याचा !! ६ !!

जगण्याचा आहे । एक मूलमंत्र
सत्कर्माचे तंत्र । शिकताना !! ७ !!

शिकताना जगी । शिका खूप काही
काही जात नाही । वाया येथे !! ८ !!

वाया येथे जाते । फक्त एक तत्व
दुष्कर्माचे सत्व । पदोपदी !! ९ !!

----- *सागरराजे निंबाळकर* -----