तिला कसे ओळखावे

_____ *तिला कसे ओळखावे* _____

बऱ्याच अवधीनंतर मज
सुचली एक कविता
हरवलो वेगळ्याच जगात
कविता लिहिता लिहिता

वळचणीवर थांबलेली कोणी
पाठमोरी एक गोरी गोमटी पोर
पाहून हवालदिल झालो
नाव दिलं तिला चित्तचोर

पाठलाग करू लागलो तिचा
तुडवीत काळीभोर माती
अवाक होऊन पानं फुलं
मजकडे एकटक पहाती

बरेच यत्न करूनही
चेहरा पाहायचाच राहिला
गुलाबाचा सुगंध घेऊन
तिच्या पाऊलखुणांवर वाहिला

पुन्हा कुठेतरी भेटल्यास ती
काळीज माझे खाईल हेलकावे
एक प्रश्न अजूनही प्रश्नच राहतो
समोरून पाहता तिला कसे ओळखावे

_____ *सागरराजे निंबाळकर* _____