कल्याण वृत्त (दुःखाचे गाणे)

वृत्त :- कल्याण

लगावली :- गागागागा ची ३ आवर्तने

तरही गझल :- पहिली ओळ ज्येष्ठ गझलकार ए के शेख ह्यांनी दिलेली. सोयीसाठी शब्दांचा क्रम मागेपुढे.

------- *दुःखाचे गाणे* -------

या दुःखाचे करता येते ज्याला गाणे
सहजी होते त्याचे येथे येणे जाणे

समजत गेलो दुःखाला मी प्रत्येकाच्या
पण कोणीही ऐकेना माझे गाऱ्हाणे

खोट्या चलना भुलले नाही जे जे त्यांना
कामी येते सत्कर्माचे सुंदर नाणे

पैसा अडका तुज देवा मी मागत नाही
पोटासाठी मज थोडेसे द्यावे दाणे

नाही चिंता काही आता वाटे मजला
माझ्या भाळी जेही आहे देवच जाणे

आनंदाने जगणे व्हावे प्रत्येकाचे
सोडा आता आधाराचे ते रडगाणे

सारीपाटाच्या खेळाने उमगत गेले
संयम ठेवत उलटावे शत्रूचे खाणे

भक्तीचा सागर गरजेचा उपवासाला
नाही केवळ केळी आणिक साबूदाणे

@ *सागरराजे निंबाळकर*