आठवणी आजही येतात

--- *आठवणी आजही येतात* ---

वर्षामागून वर्षे सरत चाललीत
तिच्या आठवणी आजही येतात
गर्दीतही एकटं पडायला होतं मग
न जाणे, मला नेमकं कुठे नेतात?

आरोप प्रत्यारोप करावेत आता
असं नातं आमच्यात उरलेलं नाही
ठिसूळ झालंय झुरून झुरून तरी
बेवारस म्हणून, कदापि पुरलेलं नाही

विसरून जातो कधीकधी अगदीच
प्रश्न पडतो, हिला मी कुठे पाहिलं?
हतबल ही होतो, आठवून सारं
हातात माझ्या, असं काय राहिलं?

पुढे आलेलो असतो आयुष्यात
क्षण एखादा, पुन्हा मागे खेचतो
काही ओळी तिच्यासाठीच होत्या
का मग मी, शब्दफुलांना वेचतो?

दरवर्षी ठरवलेला असतो संकल्प
यंदा पुन्हा एकदा ठरवूनच टाकतो
छाटून टाकायचा तो वृक्ष मुळासकट
जो आठवणींच्या हिंदोळ्यांनी वाकतो

@ *सागरराजे निंबाळकर*