हात हाती धरू (सरे मिसरा गझल)

➖➖ *हात हाती धरू* ➖➖
           (सरे मिसरा गझल)

वृत्त :- स्त्रग्विनी (गालगा ४ आवर्तने)

हात हाती धरू चल सखे जावुया
गोडसे जीवनी स्वप्न ते पाहुया

धुंद वेडावल्या आज साऱ्या दिशा
चंद्रमा मी नभी लाजरी तू निशा
तारकांच्या घरी जावुनी राहुया

तू मनीची गझल मी तुझा काफिया
भावना मांडल्या योग्य वृत्तातल्या
ही विधा घेवुनी गोडवा चाखुया

सोबतीला हवी तू मला नेहमी
साथ असता तुझी काय मजला कमी
वाट वळणावरी नेमकी चालुया

तू नदी वाहती मी किनारा तुला
अंत तुज सागरी नेहमी मी खुला
नियम हे आपले बंधने पाळुया

वादळे ही अशी येत असती सदा
प्रेम विश्वास हा सोडणे ना कदा
संशयाला अता यापुढे टाळुया

@ *सागरराजे निंबाळकर*