दिवास्वप्न होतं की, रात काळी काळी
सांग विधात्या काय, लिहिलं माझ्या भाळी
नाव तुझं गोंदताना, झाला मज त्रास
तूच राया माझा अन, तूच सखा खास
एवढ्यात आटली, अशी कशी माया
तूच होता पांडुरंग, तूच कृष्णराया
बेरंग झाली होळी, अन अंधारी दिवाळी
सांग विधात्या काय.........
येता जाता होतो मज, पावलांचा भास
वाटे मग आहेस तू, इथे हमखास
विरहात तुझ्या, होते लाही लाही
हाल माझे पूस तू, दश दिशांनाही
झालास तू परका, होता माझा कधीकाळी
सांग विधात्या काय.........
पिवळी पिवळी झाली पानं, सुकलेल्या वेली
सुंदरता वसंताची, कोणी कुठे नेली
ह्याच हातांनी जी, फुलविली बाग
निद्रिस्त झाली ती, तिला येईना जाग
हिवाळ्यात लागे, उन्हाची झळाळी
सांग विधात्या काय........
@ *सागरराजे निंबाळकर*
No comments:
Post a Comment
आपल्या अभिप्रायाबद्दल मनःपूर्वक आभार !