------- *बाप माझा* -------
संरक्षक भिंत । समाधानी चित्त
सुखांचं निमित्त । बाप माझा !! १ !!
संकटांना चाप । मायाळू निष्पाप
कष्टांचा आलाप । बाप माझा !! २ !!
मूल्यवान वेळ । सावल्यांचा खेळ
न्यारा ताळमेळ । बाप माझा !! ३ !!
नित्य प्राणवायू । स्वाभिमानी स्नायू
जगावा चिरायू । बाप माझा !! ४ !!
न्यारे वरदान । आण, बाण, शान
आईचा सन्मान । बाप माझा !! ५ !!
भुकेल्याचा घास । खचलेल्या आस
सदा आसपास । बाप माझा !! ६ !!
पोळ्यातला अर्क । सुसंगती तर्क
सदैव सतर्क । बाप माझा !! ७ !!
मदतीचा हात । निपुण निष्णात
तेवणारी वात । बाप माझा !! ८ !!
----- *सागरराजे निंबाळकर* -----
No comments:
Post a Comment
आपल्या अभिप्रायाबद्दल मनःपूर्वक आभार !