-- माहा लाडाचा ह्यो मेघ --
मेघ पावसाळी आज
मह्या शेतामंदी आले
खेळ त्यायचा रोजचा
काया मातीमंदी चाले
पहाटेच्या पारी मेघ
दिसे साजिरा गोजिरा
सांगे धरा ही खुशीने
माहा लाखाचा ह्यो हिरा
येता जाता शेतामंदी
पानं, फुलंही भेटती
झिम्मा फुगडी खेयून
मह्या अंगाले खेटती
येता जाता रोज भेटे
फुफाट्याचा गार वारा
मंग स्पर्शाने त्यायच्या
साऱ्या अंगाले शहारा
कधी हासतो खेयतो
कधी करी धुसपूस
तरी उजवतो रोज
काया आईची ही कूस
सदा राहो त्याही कृपा
माहा लाडाचा ह्यो मेघ
काया आईच्या भाळीची
दाट शोभिवंत रेघ
@ *सागरराजे निंबाळकर*
No comments:
Post a Comment
आपल्या अभिप्रायाबद्दल मनःपूर्वक आभार !