का आलो भूवरी

-------- का आलो भूवरी --------

एकांतात मज । स्फुरतात ओळी
वेदनांची होळी । करताना !! १ !!

कळला न कधी । जीवनाचे सार
आयुष्याचा भार। पेलताना !! २ !!

साऱ्यांच्या वाटेत । कैक अडथळे
चालायचे बळे । ध्येयासाठी !! ३ !!

इवल्या मनाची । उत्तुंग भरारी
फुंकते तुतारी । जणू काही !! ४ !!

द्वंद्व भावनांचे । झाले कधी जर
घालावा सत्वर । बांध मना !! ५ !!

हे करू ते करू । नसावा गोंधळ
भरावी ओंजळ । संयमाने !! ६ !!

आहे सुख दुःख । ज्याचे त्याचे ठायी
लीन व्हावे पायी । ईश्वराच्या !! ७ !!

उलगडले का? । कोडे अतातरी
का आलो भूवरी । हेत काय? !! ८ !!

😊 सागरराजे निंबाळकर