--------- शोभा बगीचाची --------
(१४ अक्षरी गीत)
हसरी फुलपाखरे, शोभा बगीचाची
छाटू नका पंख त्यांचे, विनंती नभाची !! धृ !!
खेळण्याच्या वयी जिथे, पडतात कष्ट
पाळंमुळं संस्कारांची, होती तिथे नष्ट
खताविना राहू नये, फुलं सुकुमार
वेलींनाही मग त्यांचा, वाटतो आधार
घेऊ द्यावी मनाजोगी, झेप विश्वासाची !! १ !!
दुडूदुडू धावताना, लागलेली ठेच
इवलासा जीव कसा, सोडवेल पेच
ध्यानी मनी नसताना, होते बाळ मोठे
कधी लाभ होतो कधी, भलेमोठे तोटे
पोखरते काळजाला, काळजी बाळाची !! २ !!
छकुल्याचे नाव दुजे, बाल कामगार
विटा, दगड नि माती, त्याचे आरमार
लढाया लढाई रोज, येतो रणांगणी
फुल कुठे भाळी त्याच्या, काटेच अंगणी
थांबवावे दुष्टचक्र, गरज काळाची !! ३ !!
बालपण देगा देवा, कसे म्हणू आता
कलियुगात अशा ह्या, तरते का गाथा?
वाट खाच खळग्यांची, करू मखमली
संजीवन देता फुलं, नव्याने जन्मली
मनसोक्त लाभो तया, साथ संवादाची !! ४ !!
@ सागरराजे निंबाळकर, कल्याण
संपर्क :- 8879897797 / 9324749792
No comments:
Post a Comment
आपल्या अभिप्रायाबद्दल मनःपूर्वक आभार !