➖➖ तुझ्या येण्याने ➖➖
तुझ्या येण्याने आयुष्यात आनंद आला.
जसा खिन्न पडलेल्या वहीत एक कवडसा यावा
आणि त्यासोबत आलेल्या मंद झुळुकेने
पानांची हालचाल व्हावी.
तसा मी निराश नव्हतोच कधी पण,
आस असतेच ना काही गोष्टींची
तसंच काहीसं वाटायचं तू यावंस !
तुझं येणं म्हणजे..
वसंताचं आगमन
चांदण्यांचं आकाश भ्रमण
बालकाचं निरागस मन
कोकिळेचं मधुर गुंजन
सारं काही अगदी सुखावणारं.
उशीवर डोकं टेकताच गाढ झोप लागावी इतकं सहज.
ऋतू बदलतात त्याप्रमाणेच दिवस पालटले.
माझ्यापेक्षाही कोणा दुसऱ्याची आर्त हाक
परमेश्वराजवळ पोहोचली असावी,
म्हणूनच त्याने प्रसाद म्हणून त्याच्या ओंजळीत तुला स्थान दिलं.
सागर आहे तेवढाच असतो.
फक्त भरती ओहोटीच्या वेळी पाण्याचं प्रमाण कमी जास्त होतं तशीच काहीशी अवस्था असते हल्ली माझी.
कधी सुखाच्या सरींनी किनारे ओलावतात
कधी अश्रूंच्या येण्याने कडा पाणावतात
कधी शंख शिंपले खुणावतात
तर कधी लाटांचं रौद्र रूप पाहून
आपली माणसं दुरावतात.
चाललाय हा अजब खेळ
नियतीच्या मनाप्रमाणे माझ्या मनाविरुद्ध.
आत्ताही तुझं येणं होत असतं कधीकधी पण,
आता तू कवडसा बनून न येता
विरहाची एक दाहक झळ वाटावी तशी वाटतेस.
आता पानांची हालचाल नाही चलबिचलता वाढते.
तुझ्या येण्याने हा शब्द जरी कायम असला तरी
त्यातली भावनेची मात्रा कुठेतरी कमी जास्त होतेय.
म्हणूनच आता मला कसलाही छंद बाळगण्याची इच्छा नाही
त्याचा परिणाम मी मुक्त होतोय.
कायमचा !
तुझ्या येण्याने
तुझ्या येण्याने....!
🤗 सागरराजे निंबाळकर
No comments:
Post a Comment
आपल्या अभिप्रायाबद्दल मनःपूर्वक आभार !