-- माय लेकराची नाळ --
भ्रूणहत्या करताना
कंप सुटेना हाताला
काय वाटत असावं
इवल्याशा त्या जीवाला
विधात्याने जोडलेली
माय लेकराची नाळ
येऊ द्यावे जन्मा येथे
एक निरागस बाळ
अडगळ आहे का मी?
येतो विचार मनात
बंध दृढ सलोख्याचे
होते गहाळ क्षणात
आले जर जन्मा कधी
मीच दिवा नि पणती
पारावार ना हर्षाला
नाही सुखांची गणती
सांग खरेच होती ना
आई तूही कधीकाळी
ऐकू येत नाही का गं
माझी आर्त ही किंकाळी
जास्त मागत नाही मी
फक्त एक दान द्यावे
भ्रूण पोटी न मरता
सुखरूप जन्मा यावे
@ सागरराजे निंबाळकर, कल्याण
No comments:
Post a Comment
आपल्या अभिप्रायाबद्दल मनःपूर्वक आभार !