🤗 घरचा आहेर..
टीकेस लोकांच्या । हलक्यात घ्यावे
कृतीतून द्यावे । शालजोडे ।।१।।
बुद्धी भ्रष्ट ज्याची । त्याला नसे जाण
मान, अपमान । सारखाच ।।२।।
करावी लागते । तपस्या कठोर
चूक, बरोबर । ओळखून ।।३।।
पायरी स्वतःची । त्वरे ओळखावी
कल्पनेच्या गावी । रमू नये ।।४।।
जरी कळपाने । केला कुणी वार
मानावे आभार । दुर्जनांचे ।।५।।
हा म्हणे, तो म्हणे । ज्याचे त्याच्याकडे
सनई चौघडे । नको उगा ।।६।।
आत एक आणि । वेगळे बाहेर
घरचा आहेर । देऊ त्यांना ।।७।।
🌿 सागरराजे निंबाळकर, उल्हासनगर
No comments:
Post a Comment
आपल्या अभिप्रायाबद्दल मनःपूर्वक आभार !