तू अजून प्रेमात पडलेला नाही

-- अजून तू प्रेमात पडलेला नाही --

तिच्याशिवाय हल्ली मजला
सुचेनासं झालंय खूप काही
एवढं असूनही ती म्हणते.....
अजून तू प्रेमात पडलेला नाही

चर्चा चोहीकडे झाली आमची
अर्थ अनेकांनी मनाजोगे लावले
ती ही विचार करू लागली मग
नेमके त्यामुळेच माझेही फावले

धाडस करून विचारलं शेवटी
सांग सये, काय तुझ्या मनात
नाव द्यावं आपुल्या नात्याला की
प्रतिमा आहे तशी राहू दे जनात

उत्तर टाळलं तिने शिताफीने
मात्र, स्मितहास्य सारं सांगून गेलं
हवंहवंसं वाटणारं प्रेम आता
दोहोंनी एकमेकांच्या नावे केलं

राग येतो कधी लटका तिला तर
कधी अल्लडपणे जवळही घेते
दुराव्यानंतर नातं घट्ट होत जातं
रोज नव्याने मजला खात्री देते

तर असं आहे चित्र एकंदरीत
रंग ज्यात दिलखुलास खुलतात
रोपट्याचं वृक्षात रूपांतर होतं
वेली ज्याच्या अंगणात झुलतात

🥰 सागरराजे निंबाळकर