➖➖ पंढरीची वारी ➖➖
पंढरीची वारी पायी नित्य नेमाने करतो
मुखी राम कृष्ण हरी नाम आनंदे स्मरतो
पायी दिंडीत चालण्या लाखो वैष्णवांचा मेळा
रूप साजिरे विठूचे मज दिसे लाखो वेळा
ज्ञाना, तुका, नामा, जना सारे पालखीचे भोई
तुळशीचे वृंदावन इथे भगिनींच्या डोई
कशा डौलात डोलती हाती भगव्या पताका
मुखी माऊली माऊली देती एकमेका हाका
सान थोर भेद नाही सारी त्याचीच बालके
छत्र त्याचे वाटे मज उंच आभाळा सारखे
विठू दिसता सामोरी एक टिपूस गळतो
दिसभर चालूनही शीण क्षणात पळतो
किती सांगावे अप्रूप मंदिराच्या कळसाचे
सुखावती नेत्र जसे दोन क्षण विसाव्याचे
मूर्ती सावळ्या विठूची डोळी घेता सामावून
साधा सोपा मंत्र मग नाही दुजा नामाहून
देण्या निरोप भक्तांना विठू येतो वेशीवर
पुण्य वाढते वारीने ओंजळीत पसाभर
बोल त्याचे निरोपाचे पाणी पापणीत दाटे
जड होऊन पाऊले जाती आपापल्या वाटे
@ *सागरराजे निंबाळकर*
No comments:
Post a Comment
आपल्या अभिप्रायाबद्दल मनःपूर्वक आभार !