गूढ आरोग्याचे

☺     *गूढ आरोग्याचे*     ☺

*करा योगासने । सांगे योग गुरू*

*रोगमुक्त करू । शरीराला ।।१।।*

*पश्चिमोत्तासने । सुधारे यकृत*

*लाभ तो अद्भुत । होई तना ।।२।।*

*होताच वेदना । शरीराची सूज*

*करी हितगुज । शीर्षासन ।।३।।*

*बोलता तोतरे । कधी सिंहासन*

*कधी नौकासन । नित्यनेमे ।।४।।*

*गुण दोषांसह । होता रक्त कमी*

*वाढवाया हमी । प्राणायाम ।।५।।*

*मेघ निराशेचे । येता लठ्ठपणा*

*साद हलासना । मनोभावे ।।६।।*

*हात बळकट । होण्या घेई प्रण*

*हस्तभुजासन । भारदस्त ।।७।।*

*भुजंगासनाने । पचन हलके*

*हसरे बोलके । लाभदायी ।।८।।*

*जुलाब थांबवा । सर्वांगासनाने*

*प्रसन्न मनाने । पहाटेस ।।९।।*

*बध्दकोष्टतेचं । करू उच्चाटन*

*तेथे वज्रासन । साथ देई ।।१०।।*

*गूढ आरोग्याचे । वर्णीतो सागर*

*करावा जागर । चोहीकडे ।।११।।*

      *सागरराजे निंबाळकर*

          उल्हासनगर, ठाणे