कळले नाही

गागागागा गागागागा

लिहिण्याजोगे सुचले नाही

कविता, गाणे जमले नाही 

प्रेमामध्ये हसणे-रडणे

माझ्यासोबत घडले नाही

संसाराच्या चिंतेमध्ये

महिनोमहिने हसले नाही 

संधी होती हातामध्ये

पण पायांना कळले नाही 

विश्वासागत तुटले अगदी

नाते जे तू जपले नाही

श्रीमंतांची नक्कल करणे 

गरिबांना परवडले नाही 

ओझे होते ओठांवरती

डोळ्यांना जे दिसले नाही

आई-बाबा होते तोवर

एकाजागी बसले नाही

साधे-सोपे, जगणे सुंदर

आता काही उरले नाही

~ सागरराजे निंबाळकर