जा तू सांभाळून

🌿 जा तू सांभाळून

चराचरामध्ये । ईश्वराचा वास

नको अट्टाहास । ठराविक ।।१।।

कलियुगामध्ये । आहे जो-तो व्यस्त

कुटुंब समस्त । एक नाही ।।२।।

संकटांमध्येच । देवा तुझे नाव

ओठांना सराव । नाही तुझा ।।३।।

मागती मागणे । देती जणू लाच

येईना उगाच । दारी कोणी ।।४।।

दिसतात खोटी । नाती पदोपदी

भावनेची नदी । आटलेली ।।५।।

भावा-भावामध्ये । नाही सुसंवाद

वादाने उच्छाद । मांडलेला ।।६।।

पार्थिव जायची । वाट पाहतात

त्वरे मांडतात । लेखाजोखा ।।७।।

प्रेम धनावर । असते अपार

भाव निर्विकार । गेले लया ।।८।।

शरीर राऊळी । मन घराकडे

असती वावडे । चिंतनाचे ।।९।।

देह मानवाचा । लाभतो एकदा

सार्थक सर्वदा । करू त्याचे ।।१०।।

जा तू सांभाळून । किनारी सागर

लाटांचा वावर । जिथे-तिथे ।।११।।

▪️सागरराजे निंबाळकर, कल्याण