दत्त दिगंबर

--------- दत्त दिगंबर ---------

औदुंबरी नित्य वसे, दत्त दिगंबर 

मनोभावे पुजतो मी, जुळवून कर !! धृ !!

व्रतभंग करावया, बदलून वेश 

त्रैमूर्तीचा यथोचित, जाहला प्रवेश

अनसूयेने ठेविला, अतिथींचा मान 

घेवोनिया मांडीवरी, केले स्तनपान 

एक होवो त्रिनंदन, मागितला वर 

औदुंबरी नित्य वसे, दत्त दिगंबर !! १ !!

अत्रि आश्रमी जन्मले, बाल दत्तात्रय 

ब्रम्हा-विष्णु-महेशाचा, छान समन्वय 

तीन शिरे, सहा हात, तेजस्वी बालक 

अनसूयासुत झाला, सृष्टीचा पालक 

पहावे कितीदा त्यांचे, रूप मनोहर 

औदुंबरी नित्य वसे, दत्त दिगंबर !! २ !!

माळ-कमंडलु हाती, डमरू, त्रिशुळ

उपासना, अनुष्ठाने, उद्धरिले कुळ 

धेनु, श्वानांचे सान्निध्य, औदुंबरतळी

वत्सल शरणागत, घेतात जवळी 

सेवकांच्या स्मरणाने, धावती सत्वर 

औदुंबरी नित्य वसे, दत्त दिगंबर !! ३ !!

करंजी, गाणगापूर, आणि पीठापूर

नारायणपूरी श्रींचा, वास सर्वदूर 

पादुकांची पूजा-अर्चा, दर गुरुवारी 

दत्तजयंतीची होते, जय्यत तयारी 

कृपाशीर्वादाने माझे, उजळले घर 

औदुंबरी नित्य वसे, दत्त दिगंबर !! ४ !!

@ सागरराजे निंबाळकर