-- देव आहे चराचरी --
देवालयी देव नाही
कुठे शोधू मग त्याला
प्रश्न इतुका भाबडा
नित्य पडतो मनाला !! १ !!
इथे तिथे नका शोधू
देव आहे चराचरी
फक्त ओळखा तयाला
योग्य मार्गाने सत्वरी !! २ !!
भुकेल्यास देतो अन्न
तहानल्या थोडं पाणी
देव मानावे त्यालाच
हेच सांगे संतवाणी !! ३ !!
कधी काळ देव झाला
कधी वैद्य देव होतो
भाग श्रद्धेचा हा सारा
घेई जाणूनिया जो तो !! ४ !!
चार आणे असो किंवा
नड लाख रुपयांची
भरा सढळ हाताने
ओटी गरजवंताची !! ५ !!
ध्यानीमनी नसताना
देवापरी जो धावतो
आशीर्वच त्याचा थेट
काळजात सामावतो !! ६ !!
देव मानून कर्माला
मूर्ती होतसे साकार
देव वसतो तेथेही
भक्तिभाव निराकार !! ७ !!
प्रत्येकात दिसतील
नानारुपे ईश्वराची
जर जाहली जागृत
संवेदना मानवाची !! ८ !!
@ सागरराजे निंबाळकर, उल्हासनगर
मो - ८८७९८९७७९७
No comments:
Post a Comment
आपल्या अभिप्रायाबद्दल मनःपूर्वक आभार !