भेट साजणी

वृत्त :- कलापति (प्रत्येक ओळीत १३ वर्ण)

गालगाल गालगाल गालगाल गा  

यती आठव्या आणि तेराव्या अक्षरावर 

--------- भेट साजणी ---------

प्रेमपत्र रोज रोज, धाडली जरी 

भेट साजणी हसून, एकदा तरी !! धृ !!

प्रीत आगळी जगात, आपुली सये 

दृष्ट तीज कोणतीच, लागता नये 

साजणी तुझेच वेड, लागले मला 

तूच श्वास तूच ध्यास, अंतरातला  

नाव कोरले तुझेच, काळजावरी !! १ !!

काय नेमके मनात, सांगना प्रिये 

पाहण्या मला वळून, थांबना प्रिये 

शल्य फक्त एवढेच, बोचते मना 

जायला नको कधीच, व्यर्थ प्रार्थना 

ठेवते मला कितीक, तू अधांतरी !! २ !!

गारव्यातली पहाट, स्वप्नही नवे

माग साजणी सदैव, जे तुला हवे

घेतले मिठीत आणि, लाजली सखी 

नाव ठेवले तिनेच, रत्नपारखी 

जीव गुंतला तुझ्यात, गोष्ट ही खरी !! ३ !!

@ सागरराजे निंबाळकर