--- एक एक सुरावट ---
काळ्या पांढऱ्या रेघांची
जेव्हा, संवादिनी गाते,
एक-एक सुरावट
थेट काळजात जाते !! १ !!
श्रीरंगाच्या बासुरीने
शहारता अंग-अंग,
राधेसवे वृंदावनी
होती गोपिकाही दंग !! २ !!
वीणा लावता छातीशी
गुज मनीचे कळती,
हात आपसूक माझे
तारा छेडण्या वळती !! ३ !!
हरिपाठ ऐकावया
आली मुक्ताई, जनाई,
मृदंगाच्या तालावर
नाचे विठू रखुमाई !! ४ !!
येते जमुनिया जेव्हा
डग्गा-तबल्याची जोडी,
सुखी संसारासारखी
वाढे आयुष्याची गोडी !! ५ !!
@ सागरराजे निंबाळकर, उल्हासनगर
मो - ८८७९८९७७९७
No comments:
Post a Comment
आपल्या अभिप्रायाबद्दल मनःपूर्वक आभार !