वेळ निवांत मिळाला

------- वेळ निवांत मिळाला -------

             (षोडशाक्षरी)

लाख केले सुतोवाच येथ पर्यावरणाने 

नाही ऐकले कधीही आत्मकेंद्री मानवाने 

एकीकडे विषाणूने केला मृत्यूचा सोहळा 

दुजीकडे निसर्गाने श्वास घेतला मोकळा

जंगलात फिरणारे पक्षी आलेत सामोरी 

दाणे वेचती निवांत मोरांसवे या लांडोरी 

वेळ निवांत मिळाला राघू मैनेच्या जोडीला 

व्हावी चोच रुचकर खाता पेरूच्या फोडीला 

आहे हलकी-फुलकी बनावट शरीराची 

किती सुंदर साळुंकी चोच पिवळ्या रंगाची 

मान उंचावून पाही इवलीशी रानफुले 

खाली धरा खेळावया वर आसमंत खुले 

निर्मनुष्य झाल्या वाटा हिरवाई चोहीकडे 

किलबिल पाखरांची जणू वाजती चौघडे 

भान ठेवा आतातरी यावी बुद्धी मानवाला 

वेळ जायच्या आधीच थोडे जपा निसर्गाला

@ सागरराजे निंबाळकर, उल्हासनगर

मो - ८८७९८९७७९७