✨ *गोकुळात गाजे गोपिका* ✨
पाहताच कान्हाला लाजे गोपिका
साऱ्या गोकुळात ही गाजे गोपिका !! धृ !!
फोडूनिया माठ करितो चोरी
थट्टा म्हणावी ह्याला की खेळी अघोरी
बैसला दडून कैसा झाडामागे
द्वाड खोड्या कान्हाच्या यशोदा सांगे
यौवनाच्या बहराला साजे गोपिका
साऱ्या गोकुळात ही गाजे गोपिका !! १ !!
येता गोपिका दारी घेऊन गुन्हे
ठेवले बांधून कान्हा यशोदेने
मांडावी बाजू कशी कुणा कळेना
पाऊले भीतीने कान्हाकडे वळेना
किस्से हे सांगते ताजे गोपिका
साऱ्या गोकुळात ही गाजे गोपिका !! २ !!
वाट अडवितो कान्हा वृंदावनी
पेच पडला आता कसं भरावं पाणी
केल्या विनवण्या तरी कान्हा ऐकेना
कधी म्हणतो ऐसे हे कधी तैसे ना
किणकिण पैंजणांची वाजे गोपिका
साऱ्या गोकुळात ही गाजे गोपिका !! ३ !!
झाली गट्टी एकदाची कान्हासवे
विहरती गोपी जसे नभात थवे
घुमू लागला पावा चोहीकडे
विसरूनी सारे व्हा एक गडे
कान्हा सांगी आयुष्य माझे गोपिका
साऱ्या गोकुळात ही गाजे गोपिका !! ४ !!
© *सागरराजे निंबाळकर*
उल्हासनगर, ठाणे
No comments:
Post a Comment
आपल्या अभिप्रायाबद्दल मनःपूर्वक आभार !