वृत्त :- पादाकुलक ८+८
⚜️ मिळते जागा निर्माल्याला
कधी न कळले कसे अचानक
दोघांमध्ये पडले अंतर
भेटीगाठी झाल्या जेव्हा
तब्बल एका दशकानंतर
अगदी तशीच टिकून होती
खुणवा-खुणवी नजरेमधली
संवादाची जरी नव्याने
झाली असली अदलाबदली
नाही नाही म्हणता म्हणता
रंगत गेल्या गप्पा-टप्पा
कोरडवाहू हृदयाचा मग
तुडुंब भरला क्षणात कप्पा
क्षणिक अशा या विश्वामधून
भानावरती आलो थोडे
गुंतून पडू असे वाटता
नजरेदेखत सुटले कोडे
असे मिळाले पुन्हा एकदा
वळण वेगळे आयुष्याला
कोपऱ्यात का होईना पण..
मिळते जागा निर्माल्याला
▪️सागरराजे निंबाळकर, उल्हासनगर
No comments:
Post a Comment
आपल्या अभिप्रायाबद्दल मनःपूर्वक आभार !