खुला किनारा

वृत्त :- पादाकुलक ८+८

⚜️ खुला किनारा..

हलत-डुलत बघ लाटेसंगे

किनाऱ्यावरी पोचते नाव

पाचू हिरवा, नारळ बागा

मनात भरते विहंगम गाव

पवन घालतो शीळ सारखी

जिकडे-तिकडे खुला किनारा

वैभव अवघे गडकिल्ल्यांचे

तटबंदीचा खडा पहारा

संथगतीने पाण्यामध्ये

होडी होते खाली-वरती

समीप येता शंख शिंपले

पुन्हा अचानक येते भरती

शिवणापाणी खेळत-खेळत

मजेत डुलतो घननिळ सागर

संध्यासमयी किनाऱ्यातल्या

वाळूमध्ये त्याचा वावर

▪️सागरराजे निंबाळकर, उल्हासनगर