नंदलाला

🔰 नंदलाला..

द्वापारयुगात । जन्म त्याचा झाला

श्याम नंदलाला । यशोदेचा ।।१।।

केले लाख यत्न । घेण्या त्याचे प्राण

आठवे संतान । देवकीचे ।।२।।

गोंडस सावळा । अति सुकुमार

आहेत अपार । लीला त्याच्या ।।३।।

कैक नावे त्याची । गोपाल, केशव

मुरारी, माधव । वासुदेव ।।४।।

कर्ण सुमधुर । ऐसा त्याचा पावा

लाभतो विसावा । ऐकताना ।।५।।

चालविला त्याने । अर्जुनाचा रथ

सन्मार्गाचा पथ । दाखवाया ।।६।।

महाकाव्य दावी । विष्णू अवतार

दैत्यांचा संहार । करावया ।।७।।

कृष्णाचे चरित्र । लिहितात व्यास

शब्द शब्द खास । गीता ऐसी ।।८।।

गोकुळाचा गर्व । अध्यात्माचा पर्व

लीन जेथे सर्व । कृष्ण माझा ।।९।।

🔰 सागरराजे निंबाळकर