ही खंत ना एकट्याची

🔰 खंत ना एकट्याची

दिवसागणिक साठवलेले

मनात असते बरेच काही

लाख प्रयत्नांती सुद्धा

जे ओठांवर येत नाही

ही "खंत" ना एकट्याची

प्रत्येकजण जातो यातून

चेहरा पडतो कुणाचा, तर..

कुणाला पोखरते आतून

सहन करत वेदना लाखो

स्मित ओठांवर ठेवतो

हलका का होईना, जेव्हा

किरण आशेचा तेवतो

प्रतिकूल परिस्थितीतही

नेटाने, जमून येते सारे

मात्र, त्यासाठी अगोदर हाती

घ्यावे लागतात निखारे

इच्छा जर असेल दांडगी

जलमय होते शुष्क सरोवर

ठरवता आले पाहिजे फक्त

ज्याचे त्याला चूक, बरोबर

😊 सागरराजे निंबाळकर